Aantu omathele ya sa moEuropa noAsia kuupyu …Omapeya inaaga monika nale taga fike po omalundu moEuropa

0
17

Aantu omathele oya sa kuupyu wamememe mboka wi idhenge momanenevi gaali ngoka omanenene kevi, Europe naAsia. Uupyu wa londa, onkalo yombepo ya kukuta osho wo omapeya otaga tsikile okuhanagula UK, Europe naAsia sho oshitopolwa shokuumbugantu tashi taamba ko okwenye.

Uupyu mboka ihaawu kala ko ngiika owa thikamena po oshiponga shopaunamiti shontumba miilando yi li muumbangalantu waEurope, moka oyindji yaa na iikwa niipangitho yokulonga nonkalo ndjika. Oshiholelwa, muJuli ngeno moStockholm ohamu kala mwa talala ashike nuumvo uupyu owa londa poodigree 41, mo mwa tukuka omapeya ge li 21 ngoka taga fike moSweden pethimbo ndika lyaashika oshiwinawi muule woomvula 74.

Omalelo gamwe goondoolopa oga tumu uufo wu na uuyelele kaakalimo yawo nkene ye na oku ihumbata pethimbo ndika lyuupyu. Iipangelo otayi eta mo omashina gokutalalekitha.

Mboka ya hala okuyoga itashi shuwa oshoka uupyu mbuka owa ninga omeya ga kale ge na iinima iizizi mekoololo ndika lyaStockholm.
Aaantu omayovi oya falwa koshipangelo moJapan sho ye na omandhindhiliko gombanda yomutima miiwike mbika. Naantu ya thika po40 oya sa. MoSouth Korea, uupyu owa faalela oomwenyio dhaantu ye li 10. MoGreece, omaso oga adha nale ko20, noyendji ya mona oshiponga noye li monkalo ya nayipala noonkondo, sho epaya ndyoka inaali monika mo nale moshilongo lya hanagula po oohauto, omagumbo osho wo omalundu.

Omapeya ngaka oga hanagula omagumbo moSweden, Latvia nomoNorway. Britain naye okwa li a mono uupyu wa londa, naakwashigawna ya li ya londodhwa ya kale momagumbo.

Japan okwa li a mono uupyu wa shiga ko momumvo aguhe okuza mOmaandaha sho uupyu wa tsikile nokutyakaleka moshilongo.
Uupyu owa li wa ndindhilikwa wu li poodegree 41,1 koKumagaya, oshilando shoka shi li konyala ookilometa 65 okuza moTokyo. Uupyu mbuka inawu monika mo nale sho wa li wu vule pwaamboka wa li wa ndhindhilikwa koEkawasaki kokantuntu kaShikoku muAguste 2013.
Uupyu mbuka wu li moshitopolwa ou li mo konyala ngashiingeyi iiwike yi li iyali. Aantu ye vule 40 oya sa moJapan, nomulongo moSouth Korea. “Okwa pupyala nai noonkondo omasiku ngaka, kandi wete ngele ondi li moSouth Korea nenge ondi li muumbugantuzilo waAsia,” Kim Sung-hee, omunasikola moSeoul, hoka uupyu wa londa sigo opodigree Celsius dhi li 35.7 Aantu omayovi moJapan oya falwa koshipangelo moka ye na omandhindhiliko gombanda yomutima pethimbo ndika lyuupyu.

MoGreece aantu ye vule 50 oya sa nale kuupyu osho wo omapeya ngoka ga etwa konkalo ndjika yuupyu.
Greece okwi indila omakwatho gopaigwana opo a vule okulonga nomapeya ngaka ge li popepi naAthens, moka aapashiyoni naakalimo mboka ye li popepi naAthens ya thiminikwa ya ze mo ontuku ya ye komikunkulofuta hoka taya hupithwa noombautu.
Aaniilonga yokukondjitha omundilo ye vule po300, oondhila ntano nomadhagadhaga ge li gaali oya li ya tulwa moshikonga shokudhima omundilo.

Oshikonga shokugandja uuyelele kombinga yoshiponga shuupyu moondoolopa oshi li sha vuka moParis.
Moka uupyu wa li wa dhipaga aantu omayovi mo2003. Oshilando tashi tseyitha kutya. Shika osha hala okutya aantu ye vule po8000 mboka ya talika ko ye li vulnerable kuupyu otaya ka kwatathanwa nawo kaanambelewa.– Yakuthwa ko AFP noonzo oonkwawo.

Aantu moEuropa nomoAsia otaya si kuupyu unene inaawu monika nale momanenevi ngoka gaali. Miilongo mbika aantu oyendji iyi igilila uutalala, ashike nuumvo otaya tyakalekwa kuupyu. Mefano otamu monika aantu mondoolopa Bordeaux moFrance yi igongalela pothithiya yomeya mondoolopa mpoka teya italaleke nomeya omolwa uupyu inaaye wu mona nale. (Efano: Caroline Blumberg/European Pressphoto Agency)

LEAVE A REPLY

Please enter your comment!
Please enter your name here