Africa Motto nonakuziwa ye

0
33

Oshakati

Ehuliloshiwike ndika osipana yoAfrica Motto otayi ka homona osipana yOkahandja Military School mOkahandja muudhano wolweetho lwotango mboka tawu ka tokola kutya olye pokati koosipana ndhika mbali ta ka ya koPremier Liha.

Shipi Elago okwa li a yi moonkundathana namwene gwoAfrica Motto ngoka a li zi mokalungu no ku tothamo mo nkene osipana yoAfrica Motto ya li ya totwa po.

Africa Motto osipana ya totwa po kuumati uugundjuka wa za molukanda lwOkandjengendi mOshakati mboka wa li hawu dhana owala okatanga momapandaanda oshoka ka pwa li naana osipana ya thikama po nuumati mbuka owa li uushona noonkondo.

Lwopomimvo dho 2006 lwaampoka uumatyona mbuka owa li hawu iwunganeke nokudhana mootonamende dhomomudhingoloko gwaShakati moka wa kala nokugandja uupyu koosipana ndhoka oonkulu mOshakati nonando inaya pondola okusindana ekopi lyasha pethimbo ndiyaka.
Mo 2008 oya li ya mono ekwashilipaleko okuzilila kongeshefa yoZeka ndjoka ya li ye ya fala nokuli koliha yokOmaalala oliha ndjoka oyo yi li omweelo gwokupitila okuya kooliha oonene mOshana.

Manga aamati mbaka yokOkandjengendi kohi yongeshefa yoZeka ye li kOmaalala uudhano wawo nelandulathano olya li lya hokitha omeho ga Dr Tlemore Muti ngoka pethimbo ndyoka a li ha dhanene osipana yOshakati United.

“Onda li nda popi nayo esiku limwe konima yomawudhano nonda li nde ya pula kutya ongiini ngele onda wayimine osipana yawo ashike opamuthika gwokukwashilipaleka, moka ya li ya yamukula nohamu kutya kapu na uudhigu washa, unene tuu sho ongesefa yoZeka ya li wo ta yi shongola na kaya li we yi na iiyemo ya gwana okupalutha osipana, osipana onda li nde yi pewa po no ku yi shangitha, noya li ya mono edhina epe Africa Motto,”Muti ta ti.

Africa Motto kOmaalala okwa li ashike a kala ko omvula yimwe nokwa li a yelwaayelwa opo a wayimine oSecond Division yaShana moka a li a lumbu konyala omimvo dha konda puhamano.

Mo 2017 oya li ya sindana po oliha yoSecond Division yaShana naoya li ya yelwaayelwa noku ka dhana koliha yoNorth West First Division hoka ngashiingeyi ye li yi iyadha ya sindana po oliha yongundu yoosipana dha B na ota ya kiitaalela noosipana yOkahandja Military School ongula muudhano wopaali mboka tawu totha mo ngoka ta ka ya koPremier Liha .
Africa Motto oha dhewulwa kuCollin Mhlanga, nokukwathelwa ku Alex Iitumba omudhewuli omukulu gwoYoung Chiefs, Rambo Hapuka oye Omunashipundi gwoAfrica Motto na Dr Telmore Muti oye eli mwene gwisipana ndjika.

Africa Motto omawudhano ge gwomegumbo ohe ga dhanene pUukwangula n pOshakati Independence Stadium.
Omuzalo gwe ngele ota dhanene megumbo oha zala olwaala lwomeya gwoodhime nenge lwomalemune, omanga ngele oku li pondje oha dhana e li mokambindja kolwaala olumbulawu.

Dr Muti okwa li a fatulula kutya oshitya Motto ota shiti omulilo gwa hwama ngoka ta gu fike omwiidhi onge epeya, yo oha ya itanga ta ya ti “Africa Motto Never Gives Up”.

Osipana ndjika oha yi idhewulile pehalandjandja li li kondjila yokuya kOmeege na oyena wo oshiputudhilo sho ku zula uunona uushona no moka aadhani ye li yatatu ha ya dhana mosipana yoMotto ye li iiyimati yoshiputudhilo shika.
Omwaalu omunene gwaadhani mboka haya dhana mosipana ndjika ohaya zi molukanda lwa Kandjengedi.

LEAVE A REPLY

Please enter your comment!
Please enter your name here