Efatululo lyependafule Enamibia

0
21

■ President Hage Geingob

Omasiku 26 Aguste esiku lyomapendafule, otu li mpaka twa za koombinga adhihe dhoshilongo tu dhimbulukwe esiku lyomapendafule. Epandafule oshike? Omuprofesa Philio Zimbardo, mombaapila ye okuuva ko uupendafule, ota fatulula ependafule onga “omuntu ngoka ha lundulula uukwawowanankali we (uukwatya wopaumwene) ta lundululile (mokukwathela aantu yalwe). Sho ta ningi ngawo ohaya itula komeho mokukwathela uuntu womuntu. “
Okwa fatula nawa iilonga yuufule miipambu ine: Oshi na okuningwa paiyambo; Oshi na okuningwa mekwatathano nomayakulo komuntu gumwe nenge ye vulithe po nenge omudhingoloko aguhe; Osha kwatela mo okwiitula moshiponga; nenge ongushu yonkalamwenyo na oshi na okuningwa pamukalo ngoka inapu tegelelwa ondjambi yasha.
Omapendafule ngoka hatu tanga noyelaayela ngashingeyi oga za pomahala ga yoolokathana osho wo kiitopolwa ya yoolokathana moNamibia ayihe. Ashike ayehe oye na uukwtya wa faathana. Ohaya kala nehalo enene opo ya lundulule oaiyuvo gawo nenge uukwawowanakali wawo nokulonga iilonga yuupenda.

Nonando pe na mboka ya ninguluka, omapendafule getu inaga hulila ondjilakati. Oya ya mela lyoshiyamakuti opo ya kondjithe uukoloni osho wo omahepeko gokatongotongo. Oye shi ninga paiyambo lyawo mokuyakula aantu yomoshilongo shawo. Oye shi ninga at ya tula uuwanawa wawo moshiponga osho wo ongushu yonkalamwe yawo. Yo oye shi ninga inaya tegelela ya futwe nando ondjambi yasha. Omapendafule getu ngoka otatu ga dhimbulukwa tatuga yelaayela, oga li gu uvite ko ompumbwe yokutinda uukoloni.
Mo Dar-es Salaam, tse moSwapo otwa li twa tseyitha kutya aakondjelimanguluko yetu oya li ya ningi eponokelo lyotango kOmugulugwombashe muuningininombugantu waNamibia. Mesiku ndyoka, 26 Aguste 1966 Aanamibia oya li ya ningi oshilage nonakuyiwa na inaya tala we konima. Aakondjelimanguluko oya li yu umbu ooholo dhotango nongeyo, moka ya li taya yamukula eindilo lyaHailwa Peter Nanyemba ngoka a tile, “Katu na we omukalo gumwe gwaashi gwokukutha iilwitho opo tu mone emanguluko lyetu yene. Otse tatu imangulula tse yene.” Moku imangulula tse yene, aalumentu naakiintu oofule moNamibia oyi itulila uukwatya wawo wuupendafule.
Aantu yomevi ndika oya li ya tindi okutaamba ko omukalo gwokatongotongo. Ngaashi naana Kaptein Hendrik Witbooi ngoka uule woomvula ethele a li nokukwathela momalugodhi gokulwitha uukoloni, “Natu seni tatu kondjo,” Naanamibia oyandji oya tindi okutaamba ko ethindilo kongudhi. Oya li ya dhimbulula kutya osho wo oshipatatululo shemanguluko lyawo oshi li momake gawo yene.
Meni osho wo pondje yoshilongo, Aanamibia oya li yu uvite kutya okukondjitha uukoloni nokatongotongo otayi kala yi kala omwbiinayi, ondulu nonde. Ashike yo oya li yi ilongekidha okusa taya kondjo shi vulithe okukala kohi yuupika wokatongotongo.
Otwa adha uukumwe nuuthemba,omidhi dhomaitaalo getu gaali gomundatu ngoka twa tula mendhindhiliko lyaNamibia osho wo mekotampango lyoshilongo. Eyitaalo etitatu nolyahugunina, UUYUUKI.

Sho tandi mu popitha nena, Aanamibia aakwetu, otwa kala tatu kondjitha okukwashilipaleka uuyuuki uule woomvula omi-28 dha za ko. Osho twa li tatu kondjele, uuyuuki. Uuyuuki poontsapo dhawo awuhe, ethikopamwe lyoompito, osho wo ompito yonkalamwenyo kOmunamibia kehe. Ndika olyo euvaneko twa ninga petotepo lyoRepublic yaNamibia.

Okuyelaayela omapendafule ngoka ga ka lala nale otu na okulonga nuudhiginini, tse tatu longo noonkondo koshilonga shitu lile po atuhe. Omashongo opo taga kala.Ashike atuhe otu shi shi nawa kutya otwa enda oonkatu dhontumba muule woomvula 28. Omuthika guuthigona ogwa shuna pevi, iikwa niipangitho oga tamunuka, opeenzela yaakulupe , ndjoka hayi thiki momakegaamboka ye ga nuninwa oopelesenda 99 oya gwedhelwa noopelesenda dhi vule 60 muule woomvula ndatu twa za opo dhi adhe ooN$1 200.

Oosikola odhindji odha tungwa moshilongo. Ngashingeyi otwa taalela opoloyeka onenene yokulonga iikwa niipangitho moshilongo ashihe. Kashi shi oshili okutya kape na shoka sha longwa po. Sho tatu kambadhala okulonga nomashongo ngoka ga gwedhwa po, nena out na okutala iinima mbika, osho woedhipago li nyanyaleka nomadhilaadhilo ga yela noneendelelo.

Manga tu na Aanamibia aathigona, mboka yaa na kutya otaya ikwatha nashike, mboka inaya pewa oofuto molwa omawuwinayi ngoka ya ningilwa moomvula twa za, itatu vulu okupay okuyelaayela umboka ya sila mokukondjela Namibia naantu yasho.

Ondi itaala kutya otu na okukala tu na oonkundathana oondhigu onga Aanamibia, nelalakano lyokumona omayamukulo ge na ombili notaga kalelele komashongo guuhaathikepamwe, okwaa he na evi osho wo uuwehamemo womadhipago ga kenyaneka. Sho tatu kambadhala okumona omayamukulo kwaambyoka nda tumbula, inatu ihumbata onga epangelo lyaa na shoka tali longo.
Otatu kamabadhala lela, nangele otwi imanga omaako kumwe nena otatu ka adha omalalakano getu. Inatu sholola kumboka taya kambadhala oku tu topola mukehe ompito. Otaya ka ndopa.
Moshipopiwa shandje shotango shokupopitha oshigwana mo2015, onda li nda tseyitha kutya omutumba omutiyali gwevi otagu ka longekidhwa. Osha li sha ningwa netompelo lyokutota ehala moka omulandu gwokulanda evi kumboka ye na, mboka ya pumbwa okutulululwa mevi lyooyinakulu, ekuthoko lyevi niifuta tayi opalele, etalululo lyevi lyomoondoolopa osho wo omulandu gwetulululo, osho wo omusinda omutiligane otayi vulu oku ipulwa muule. Omutumba gwevi otagu ka kala ko okuza mu01-sigo 03 Kotomba nuumvo. Otagu ka ningwa momukalo gu li koontundulu.

Epangelo otali patulula oonkundathana dhomilandu ndhika oodhigu oshoka inapu kala nando ogumwe ta dhiladhila kutya olugodhi lwetu lwokukondjela emanguluko olwe ya pehulilo. Otatu tsikile nokudhimbulula kutya olugodhi lwetu olwe ya molweetho olutiyali, ekondjelo lyeliko osho wo uuyuuki. Ekondjelo lyoshilongo oshihwepo otali tsikile sigo tatu sindana.
Manga inaatu adha uuyuuki waantu oyendji, itatu thuwa oshoka iilonga yetu inayi pwa.
Epangelo otali ka konga omikalo adhihe ndhoka dhi li po opo li kondjithe eyooloko lyiiyemo, onkalo yokwaahe na iilonga yi li pombanda osho wo onkalo yoluhepo. Otatu vulu ashike okutanga omapendafule ngele otwa longitha uuyamba wetu. Opo uuthemba nemanguluko lyetu lyi kale li na sho tali ti, out na okugalulila uuntu womuntu kaantu yetu.
Egalululo otali vulu ashike okuya okupitila momapukululo giinima mbyoka yaa li pawuyuuki. Ngele itatu vulu okupukulula omapuko gomonakuziwa okupitila momilandu dhi li mondjila, nena ombili yetu itayi kala ethimbo ele. Otandi mu hiyi amuhe mu kale oshitopolwa sholweendo. Kape na ngoka a pumbwa okukala po.
Aanamibia aakwetu,

Iita kayi shi oshinima oshiwanawa. Inayi kala moshilongo sha manguluka. Natu idhimbulukitheni kutya aluhe oshipu okuteya. Ashike, okutungulula oshinima oshidhigu. Kiita ohaku yiwa shike uuna uunadiplomate wa ndopa.
Sho nakusa Hailwa Peter Nanyemba a li a popi ta ti, “Otatu ka pita omilonga odhindji dhombinzi manga inaatu adha emanguluko lyetu,” kasha li sha popiwa nuupu. Osho kwa dhimbululwa kutya kapwa li we ondjila yimwe okuya kemanguluko yaa shi ondjila yiita.
Omapendafule ngoka tatu tanga mesiku ndika lyonena oga li ga hupula oomwenyo dhago molwa oshinakugwanithwa. Elalakano olya li emanguluko! Miita, omu na iinimangwanima oyindji iiwinayi koombinga adhihe tadhi kondjithathana. Aantu ohaya dhipagwa, ohaya tulwa moondholongo nomapya oga hanagulwa po, omanga yamwe ya kana na inaya monika we.
Yamwe ohaya yi ontuku okuza momagumbo gawo nokuninga oontawuki. Ope na mboka ya li ya thindilwa ya kuthe ombinga kombinga yomutondi. Miita aantu ohaya si. Ayihe mbika iilanduli yiita.
Sha landula euvathano lyokutula po iilwitho lyomo1988, ndyoka lya li ya shainwa koSwapo, kepangelo lyaAngola nolyaSouth Africa, opwa li pwa tulwa oongamba opo ku tulwe miilonga ompangela yiigwanahangano yemanguluko lyaNamibia, ngashi sha li mokatokolitho 435 kewawa lyegameno lyiigwanahangano,

Ayehe mboka ya li taya lu koombinga adhihe oya li ya pewa egameno. Mboka ya li ya longele kumwe nomutondi, noya li taya kambadhala okuya moshipala olweendo lwetu okuya kemanguluko oya li ya dhiminwa po, noya li ya pitikwa ya kuthe ombinga momahogololo ngoka ga li ga wilika kiigwanahangano mo1989.

Omahogololo oga li ga ningwa noSwapo oya li ya sindana. Onga okanona kuukwawowanankali kopaigwana, Namibia okwa li a adha onkatu yemanguluko oshoka ekondjelomanguluko lyetu olya li lya yambidhidhwa kiilongo ngaashi Nigeria, Cuba naAngola. Nandi tumbule wo kutya Iigwanahangano, iilongo yoScandinavia niilongo yuusoshialise. Nandi londodhe, ope na mboka ya hala okukokola iilalo iikulu, yo ye shi shi nawa kutya oyendji mboka ya li ya longele kumwe naamboka ya longele Aanamibia iikulumuna natango omo ye li muka. Natu galule oopolisi dhoKoevoet, aatonateli yondholongo yoRobben Island tse tu ya pangule sho ya li ya edhilile Eliaser Tuhadeleni, Martin Kapewasha, Gerson Veii, Helao Shityuwete, Andimba Toivo yaToivo, John Pandeni, Jerry Ekandjo, Petrus Iilonga, Immanuel Shifidi, Willem Biwa nayakwawo oyendji? Natu ya pangule sho ya li ye tu tidha moshilongo shetu uule woomvula dha adha pomi-30? Natu ya pangule sho ya li ya lele aantu moshilongo shetu shaa li pamukalo gwopauntu? Inatu dhimbweni kutya Aanamibia oya li ya talika ko onga kaaye shi aantu nawa, ya li ya keelelwa elongo osho wo omauthemba galwe. Aantu yamwe omo ye li muuluyi wetu mboka ya yonagula omauthemba getu. Natango momitse dhetu yamwe mbaka ya yonagula omauthemba getu omo ye li. Nandi londodhe Aanamibia aakwetu yaa tale konakuziwa yawo ya luudha. Natu taleni konakuyiwa yi na ombili, edhiminathananopo osho wo eyaluko. Natu imangeni omaako kumwe muukumwe nuuyuuki opo Namibia li kale ehwepo.
Inatu kanitha elalakano ndyoka Aanamibia oyendji ya li ya hupula oomwenyo dhawo.
Osha li shi na sha nuukumwe, uuthemba wetu nuuyuuki. Omasiku ge li gatano ga pita, onda li nda yi moonkundathana dhoowili ntano kegumbo lyepangelo naalongwa ya za koNdama Combined School moRundu. Onde ya dhimbulukitha kutya oye na okudhana onkandangala onene metungepo lyoshigwana.

Onde ya lombwela kutya naya kale ye na uuntsa naampoka ya za nenge nomuthigululwakalo gawo. Ashike inaya itaala kutya omuhoko gwawo oguvule omihoko omikwawo.
Atuheni natu kaleni aatungi yoshigwana. Inatu temeni omulilo guukwamuhoko nomatopaukathano opo tu kaleni tu wetike moshigwanana. Shoka oshinima oshiwinayi.

Emanguluko lyetu olye ya kondando yi li pombanda noonkondo, onkene inatu li kutheni ongushu moku yi kutha ko lyaa na oshilonga. Ngaashi omukokolipresidente gwetu ha ti ti, “otatu kala aluhe tu na ongunga yaalumentu naakiintu Aanamibia mboka ya futa nonkalamwenyo yawo opo oshilongo shetu shi mone ombili osho wo uudemokoli.

Otatu kala tu li twi ikwatelela koondjodhi dhawo moku eta po epangelo lyombili tali gandja oompito kaakwashigwana opo ya longe shoka taya longo.” Sho tatu tyapula esiku ndika, tatu dhimbulukwa nokudhilaadhila esiku ndika, 26 Aguste, natu ituleni mo, mokudhimbulukwa aalumentu naakiintu yetu omapenda, tu kalekeni po oshilongo shombili, shi na uukumwe notashi humu nawa komeho.

Sho tatu tyapula esiku ndika, esiku lyomapendafule, natu kongeni ombepo yuupendafule yaKaptein Hendrik Witbooi, Omukwaniilwa Samuel Maharero, Omukwaniilwa Kahimemua Nguvauva, Kaptein Jacob Marengo, Omukwaniilwa Nehale lyaMpingana, Omukwaniilwa Mandume yaNdemufayo, Omukwaniilwa Ipumbu yaTshilongo, Omukwaniilwa Hosea Kutako nameme Kakurukaze Mungunda. Natu dhimbulukweni omalugodhi agehe moka mwa sila Aanamibia, okuza moLishora muka moKavango sigo okoCuito Cuanavale moAngola.

Natu wilikweni kombepo yomukokolipresidente, Hailwa Sam Nujoma osho wo omupresidente gwetu omutiyali Hifikepunye Pohamba. Sho tatu longo moNamibia moka kape na ngoka a pumbwa okuthigala po, natu imangeni omaako kumwe tu endeni mombepo yoHarambee.
Shika oshipopiwa shoka Presidente Hage Geingob a li a gandja pesiku lyomapendafule moNkurenkuru, momasiku 26 Auguste.

LEAVE A REPLY

Please enter your comment!
Please enter your name here