Kapere ta pula ku inikwe komilungu shi na sha neikutho lyomapunda

0
44
SONY DSC

■ Lot Shikongo

OKANGUATI- Omunashipundi omukuluntu gwElelo lyAanyasha mOshilongo (NYC), Mandela Kapere, okwa indila opo ku ningwe oonkundathana, tadhi ningwa nomadhilaadhilo ga yela koshinima sheikutho lyepunda shoka sha vuka moshilongo, unene tuu mokati kaanyasha.
Kapere sho a popi nomuthindo pethimbo lyoshigongi shomapendulepo gaagundjika moKunene shoka sha li shi li moKanguati moshikandjohogololo shEpupa, okwa ti ope na ompumbwe yokukundathana kombinga yoshikumungu shokwiikutha omapunda moshilongo opo ku talike ngele nashi tulwe paveta.

Shi ikwatelela kuye mwene, oshinima shoku ikutha omapunda osha pumbwa okukundathanwa inaashi kwatakanithwa neitaalo lyopambepo.
“Itatu vulu okupatana kutya okuza momidhingoloko dhetu omu na uunona owundji inawu halika mboka wa thigwa tawu mono iihuna koluhepo osho wo onkalo yaa na esiloshimpwyiyu lyokolela,” osho a ti, ta ti ngele opena omukalo gu li nawa gokutha mo omapunda nena onkalo otayi ka hwepopala.

Oonkundathana ndhika odhe ya konima sho okangundu ka li taka kundathana onkalo yopaunamiti yaanyasha, moka omuleli nguka gwaanyasha a li a popi nomuthindo ta ti “kutya nee otu shi hole nenge katu shi hole, eikutho lyomapunda, ngaashi naana omayooloko gwokuhogolola okuya momilalo iinima mbyoka tayi ningwa mokati ketu.”
Kapere ta tsikile wo noku ulika kombinga yiipotha oyindji yuunona uushona tawu hokanwa moKunene, ndhoka dha thikama poopelesenda 34 moshilongo ashihe.

“Otwa pumbwa okulonga aantu yetu ya dhimbulule kutya oshinima shuunona tawu hokanwa eyonagulo lyuuthemba wuunona,” Kapere ta ti.
Omapopyo gaKapere kombinga yoshinima shokuninga ekutho lyomapunda lyi tulwe paveta oga li ga ekelwahi mbala komupeviminista gwuukashikekookantu nonkalonawa yuunona, Lucia Witbooi, ngoka a ti ita yambidhidha oshinima shoka oshoka oshi li ompinge nuukelesiti.

Witbooi okwa ti aakiintu mboka taya ki iyadha pokati koshilaleko nomukonda ngele naya kale naanona yawo nenge naya kuthe mo omapunda naya konge shapo omakwatho kuuministeli we oshoka owu na oopolohalama osho wo omikalo dhokuyambidhidha miinima ngambika.
“Omulumentu guni ta hala okuhombola omukiintu ngoka a ikutha epunda iikando iyali nenge itatu? Ngeno okwa li ongame ngeno itandi hokana omukiintu a tya ngaaka!” Witbooi osho a popi yo aantu taya yolo, ye ta popi natango kutya orbortion oya puka mosociety yongashingeyi.

Omutumba nguka gwa kala ko uule womasiku gatatu ogwa li gwa eta pamwe aagundjuka ye li 130 okuza miikandjohogololo iheyali yaKunene mboka ya li yi inika komilungu shi na sha netotepo lyompito yiilonga, omaudhano gaagundjuka, uunkulungu, omuthigululwakalo, elongo osho wo eyambulepo lyuunongo, uundjolowele nonkalonawa.

Omutumba ogwa li gu unganekwa kOshikondo shAanyasha yaKunene pamwe nombelewa yaNgoloneya gwaKunene.
*Lot Shikongo Omunambelewa omukuluntu mUuministeli Womakwatathano mOmbelewa yelelo lyoshitopolwa shaKunene.

LEAVE A REPLY

Please enter your comment!
Please enter your name here