Namibia okwa pumbwa omangeshefelo omape –Mbumba

0
38
cof

■ Helvy Shaanika

Ongwediva – Omupevipresidente gwaNamibia, Nangolo Mbumba okwa ti oshilongo osha pumbwa okuya po nomangeshefelo omape opo ku yumudhwe eliko lyoshilongo. Pethimbo ta egulula omaulikilo giipindi gokomumvo gaNgwediva mOmaandaha, Mbumba okwa ti othina yeliko ndjoka yi iteyela moshilongo ngashiingeyi oyi li onga oshaandukithi kashi shi ashike kepangelo, ashike nokoshikondo shoongeshefa woo.
“Osha yela ngashiingeyi shi vulithe nale kutya, otwa pumbwa oonkondo dheliko okuza koshikondo shopauwumwene opo ye ete omayambidhidho gawo kiiyemo yomoshilongo ya kwatelwa komeho kuunongo neyitulemo osho wo omawunawa gaayehe. Itatu vulu we oku ikolelela mokufula oonzo dhopaushitwe.” Mbumba ta ti.

Mbumba ta gewedha po kutya, oshilongo osha pumbwa oku endelela okuza koshikondo shepangelo okuya po nomadhiilaadhilo gwoongeshfa ndhoka tadhi ka lundulula onkalo.

Omupeviminista ta indileomahangano gepangelo nuuministeli wu kale wa nuka po nowa ilongekidha, ndele inaya tegelela ashike presidente nenge omuprima a ulike omawupyakadhi ngoka ge li po, nengeya yamukule ashike uuna oshinima shontumba shi li miikundaneki.
“Ooministeli naanambelewa yawo naya kwatele komeho shika, popyeni naantu, ne tamu ya po nomaymukulo, Kashi shi ike aantu mba ya pyokoka, ashike otseni, mepangelo nomoshikondo shopawumwene, ngele otwa longeleni kumwe otatu ka tanauna onkalo yeliko ndika e tatu kutha oonkatu ndhoka dha pumbiwa,” Ta ti ngaaka.

Mbumba okwa gandja oshiholelwa sheshunopevi lyeliko osho wo ekano lyiilonga mOshikango shoka sha li shu ulikwa omasiku ngaka koNBC. Ta ti omashongo geliko ngandyoka lyOkoshikango oga pumbwa oku taalelwa.

“Sho tatu popi oku eta po omudhingoloko tagu pitikaehumokomeho, iinima yimwe ya simana mbyoka tu na okutala omwa kwatelwa to oku upika omangeshefelo getu osho wo omudhingoloko gwongeshefa, okushunitha pevi iifuta yiinima tayi ya moshilongo osho woo omilandu dhilwe ndhoka tadhi gumu omangeshefelo gomeni naangoka taga zi pondje yoshilongo, osho wo ompumbwe yokulundulula omikalo dhetu ngele tatu tala omangeshefelo gomoshilongo naangoka gopondje yoshilongo noku ikaleka kokule onga twa fa aantu aahahu ngele tashi ya koompito dhomangeshefelo, otu na okulundulula omukalotalelo gwetu twe gu ukitha kaantu aanyakukwi, naashika osha kwatela mo atuheni, aanapolitika, aaniilonga yepangelo, aakuluntu miilonga, niikundaneki wo,” Ta ti ngaaka.

Mayola gwondoolopa yaNgediva Angeline Angula okwa ti omaulikilo giipindi gaNgwediva otaga popi elaka limwe noopolohalama dhoshigwana mwa kwatelwa Harambee Prosperity Plan, NDP5 nosho wo omulandu gokufala omayakulo moshigwana.

“Omaulikilo gokomumvo gaNgwediva otaga nkondopeke oongudhi ndhika; ngaashi epangelo tali longo nawa okupitila mooministeli niikondo ya yama kepangelo mbyoka yi li mpano, ehumokomeho lyeliko okupitila mekuthombinga lyiikondo yopaumwene poonkatu adhihe osho wo lyomandiki gwomadheulo nomalelo gopaitopolwa. Eliko lyetu otali humu nawa komeho pompito ndji.” Angula ta ti.

Omvula ndjika omaulikilo giipindi ngaka otaga dhanwa kohi yoshipalanyolo “okutotapo nokupitika omudhingoloko gweliko lyu uka komeho.”

LEAVE A REPLY

Please enter your comment!
Please enter your name here