NPL itayi kala we nomawudhano gaali mehuliloshiwike limwe, Tovey ta ti

0
23

■ Shipi Elago

OSHAKATI – Ewiliko lyOliha Onene moshilongo yoMTC (MTC Namibia Premier League) oli li lya kutha etokolo opo oosipana ndhoka hadhi dhana moliha ndjika dhi kale hadhi dhana uudhano wumwe ashike mehuliloshiwike okuyelekanitha nomonakuziwa moka oosipana dha kala no ku dhana uudhano uuwali olyomakaya nosoodaha.

Dhika odha li dha kolekwa ku Tovey Hoebebe ngoka eli omunambelewa gwoNPL pethimbo a li moonkundathana naKundana, tati oye li ya kutha etokolo ndika opo ya tule ondondo yokatanga pombanda no ku pa aayambidhidhi uudhano uuwanawa.

“Ewiliko lya NPL olya li lya dhidhilike nkene okudhana lwaali mehuliloshiwike limwe ku li ta ku shonopeke ondondo nongushu yuudhano wa NPL oshoka oosipana oha dhi dhana uudhano uutiyali dha vulwa na iha dhi dhana we pandjele ndjoka yategelelwa na oha dhi mono omayehamo ogendji,” Tovey tati.

Okwati oosipana ngele ota dhi dhana lwumwe mehuliloshiwike nena ota dhi kala dha ilongekidhila uudhano wawo mboka wumwe kakuna we na ota dhi ka dhana dha mana mo naashika ota shi ka pa aaholiyomawudhano omayinyanyudho kakuna we.

Okwati omufolomo ngoka ta gu longithwa pethimbo lyongashiingeyi ogwa li gwa tulwa miilonga oku kwathela ka dhi longithe oshimaliwa oshindji momalweendo, ashike Tovey okwa kunkilile oosipana opo dhi dhidhilike kutya okatanga kokoompadhi ngashiingeyi oko ongesefa onkene na dhi kutheko oongaku opo dhi tale nkene ta dhi eta oshimaliwa mooKalaba dhawo no ku hwahwameka aatali ye ye kuupale momangungo no pa mukalo ngoka ota ya vulu oku imonena oshimaliwa shagwedhwa po shoka ta ya vulu oku longitha miinyangadhalwa yesiku nesiku.

Tovey okwa ti edhiladhilo ndika ina li tulwa natango miilonga oshoka olya tegelelwa li ka kolekwe momutumba gwoNPL ngoka gwiliko mo 15 ga Septemba nuumvo ngoka ogwo guna oonkondo oku tula enene dhilaadhilo ndika miilonga.

“Iilongo ayihe mbyoka yaputuka ooliha dhawo oha dhi dhanwa ashike lwumwe mehuliloshiwike kehe n aka puna osipana ha dhi dhana omawudhano gaali muule womasiku galambathana, shika ota shi kwathele oku nana aakwashilipaleki, osho wo omwaalu gwaatali puupale oshoka ito vulu oku gongaleka aantu lwaali pokapale uule wehuliloshiwike limwe oshoka aantu nayo oyena iinakugwanithwa oyindji,” Tovey tatsikile.

Okwa ti oliha yoNPL oya tengenekwa yi ka tameke ehulilshiwike lyomasiku gatano ga Kotomba onkene oosipana na dhi ninge shitika shiye opo dhi shangithe aadhani mboka ta dhi ka longitha molweetho lwotango lwoliha .

Tovey okwa li wo a popi kashona kombinga yoshikumungu shoosipana dha NDF moka ati ita ya vulu natango oku popya ko oshoka kayena uuyelele wi ihwa po ngele mboka ta wu ulike kutya oosipana dhika odhomuntu gwumwe .

Ashike Tovey okwati ompango oyi li ya yela kutya kapuna ehangano nenge omuntu a pitikwa oku kala ena oosipana mbali moliha ndjika, opo ku yandwe okudhengela odhi peho oshoka oosipana ngele eemwayinathana ota dhi vulu okwiipa iitsa uuna dhi iyadha muupyakadhi.
Ta gandja oshiholelwa tati ngele osipana yimwe oya pumbwa iitsa tatu opo yi sindanepo oliha nookoola dhontumba nena sho ta dhi kadhana nosipana omwayina nena ota dhi vulu owala okudhana uulangedhi eta yi etha yi tulwe ookoola dhoka dha pumbiwa naashika FIFA oku li eshi kenyanana.

LEAVE A REPLY

Please enter your comment!
Please enter your name here