Oshiwana sha djala oikutu ilaula okudimbuluka Avihe

0
496

■ Komutoolinghundana

ONGWEDIVA – Edipao linyanyalifa la ningilwa okaana kokakadona Cheryl Avihe Ujaha oshivike eshi moWindhoek ola etela Ovanamibia vahapu ehandu, oluhodi nonghumwe.

Okudja nghee onghundana yefyo laAvihe ya udika, oshiwana keembinga neembinga osha kala noku holola omaliudo asho unene ko social media oko ovanhu tava holola omanyeme avo, omailikano, omalipulo, oumbada navamwe otava yandje oushima.
Kakele komanyolo, mEtitatu, ovanhu vahapu ova li va ninga omidjalo defiku dili moluvala lilaula okuholola oluhodi. Vamwe otava unganeke yoo omangudumano omailikano opo ku ilikanenwe nakuninga oshikulumanene eshi a monike.
Ouyelele uli moshifokundaneki shomwainafana naKundana shoNew Era otau holola kutya olutu lokaana aka ola li la hangwa momulamba popepi no Taavans moKatutura, pokandjila kokolupadi.

Mefano omo mwa hangwa olutu la Avihe otali ulike kutya okaana aka oka longelwa oixuna ihe fi okudilaadilwa, noikulumanene oyo hapo ya longelwa ponhele opo la hangwa, opo oka ekelwa po ashike.

Otaku hokololwa okaana oka olutu lako la li tali ulike la fulukifwa, koo vali oka li ka tetwa, moinhimbu, noilyo imwe yolutu ngaashi omaoko nomaulu oya hangwa ya panaunwa ko kolutu. Omutwe wako nao owa hangwa wa tetwa ko.

Otaku hokololwa omhadi, eemhati, ofingo nekelimwe lokaana oko la hangwa lihe po ponhele opo, nokaku shivike kutya oilyo oyo oya yukifwa peni. Vamwe otava fekele kutya otashi dulika ya longifwa moilonga yomindaba, manga vamwe tava fekele kutya oinhimbu oyo oya kufwa po ashike onga elalakano lokukanifa oinghoti koo kudilaadilwe kutya okaana oka dipawa kovanamindaba.
Otaku hokololwa okaana aka ka kana mOsoondaxa, nonhele opo ka monika lwaxuuninwa vati omostalata popepi neumbo lavo. Fiyo opapa ndalaiva ou a li heka twala kofikola oye ashike a li a pulwa pulwa kopolifi ashike okwali a efiwa shaashi kape na ouyelele tau ulike kutya oku na mo sha medipao lokaana oko.

“Otaku tiwa ina tu li kufila oveta, ashike oshimhung shouyuuki kasha na mayoo. Oshimhungu shuyuuki moshilongo shetu ota shi amene ovakolokoshi. Eengangala paife oda tali ka ko da fimana di dule ooihakanwa yado, oufemba wavo wa amenwa omanga va nyengwa okufimaneka oufemba wa vakwao.

“Alushe eengangala ngeenge oda i momake opolifi out shi kutya oda wila momake mawa –oda wila meameno, omanga fye hatu fiwa opo tu tale kutya oha tu lili ngahelipi ovanhu vetu ovo va dipaa, nohatu piti mo ngahelipi moshilemo osho sho laula sholuhodi.

Otashi lulumike oku kala u na omumwoye a kwatwa onghonga nokudipawa, ashike naku shi ninga oto mu muno mongula ta enda a manguluka e li futila mo nale mo dolongo,” osho umwe a holola eudo nail aye.
Vahapu otava pula opo ku ningwe omakonaakono a kwata moiti opo nakudipaa Avihe a kwatwe meendelelo.

LEAVE A REPLY

Please enter your comment!
Please enter your name here