Tjongarero a tumbaleka ekopi lyoScorpion Zinc

0
38

WINDHOEK – Ongongahangano yokatanga kokoompadhi moshilongo (NFA) oya gandja olupandu lwayo kuudhano wekopi lyaamati ye li kohi yoomvula 17 lyoScorpion Zinc kutya owa enda kolutenda. Osipana yaamati yoko//Kharas oya li mOmaandaha ya pewa oshishani shayo konima sho ya dhenge Omaheke 3-1 koopelenti.

//Kharas oya li ya fadhuka po nekopi, ooN$25 00 noombandi dhoshingoli. Omaheke oya li ya hekelekwa noombandi dhoshisiliveli nokapandi kooN$15 000. Momapulaapulo noNampa oshiwike shika, omukwatelikomeho gwomaudhano gwaNFA Timo Tjongarero okwa fatulula kutya otonamende ndjika ya li ya dhanenwa koGrootfontein moshitoplolwa shaOtjozondjupa, oya li pamuthika gwopombanda.
“Omuthika guudhano ogwa li pombanda okuyelekanitha nootonamende oonkwawo. Shika ondi wete sha li sha kwathelwa konkalo yonkapale kOmulunga,” Ta ti ngaaka.

Ta gwedha mo kutya omwa li mu na aadani ye na iipewa okuza kiitopolwa ayihe. “Omukwati gwaZambezi oku na olutu olwaanawa, ndoka ngele olwa kwatwa nawa, ota ka ninga omudhani omwaanawa Ope na omumati gumwe gokOtjozondjupa e na omeho gokoola, oshinima shimwe shoka katu na mo moNamibia ngashiingeyi,” ta popi ngaaka.

Ta tsu omuthindo kutya ope na aadhani ya za ko//Kharas, hoka omalutu gawo ge ya kengelele, ashike ngele oya ufena nawa, otaya ka shituka aadhani aawanawa ye na uunongo. Ta tsikile kutya omudhani dhingi motonamende ndjika, Dandre Botha gwoko//Kharas okwa ulika ongushu ye, okokutya ota vulu okuka kala gumwe gwomaadhani dhingi moshilongo konahiya.

Omudheuli nguka ta popi kutya ye pamwe naadheuli yakwawo oya dhimbulula kutya oosipana dhimwe odha li dhi ilongekidha lela nawa.
Ngaashi shito, otatu longitha uudhano mbuka tu hogolole aadhani mboka taya ka kalela po oshilongo kekopi lyoCosafa lyaamati ye li kohi yoomvula 19, tse otwa mona ko wo aadhani mboka tatu vulu okulongitha mo2020 ishewe,” ta ti ngaaka.

Shika otashi pe osipana ndjoka hayi hogolola yi longe ethimbo nuule naamati sho taya ilongekidhile ekopi lyomomumvo 2020, ndyoka tali ka longithwa wo natango onga omo tamu pitilwa okuya kekopi lyiigwana yaAfrica lyaamati ye li kohi yoomvula 17.– NAMPA

LEAVE A REPLY

Please enter your comment!
Please enter your name here