China ota vulu okukala kuume omwaanawa momalandithilo

0
28

Oshiwike shika China okwa tseyitha kutya otaka gandja iimiliwa yoobilion dhaAmerica omilongo-60 (US$60) yanuninwa ehumokomeho menenevi lyaAfrica.

Etokolo ndika olya nyanwa kiilongo oyindji yokUuninginino, mbyoka yi wete kutya China ota longitha uulingilingi opo a tule iilongo yaAfrica muupika woongunga oonene itadhi ka vulika okufutwa. Aanyani yaChina otaya tompola kutya ngele Africa okwa taamba ko ekwatho lyiimaliwa mbika e ta nyengwa okufuta oondjo dhaChina, otashi vulika China a ka kwate ko omaliko gaAfrica, mwa kwatelwa ngaashi uupale woondhila nenge omatulilosikepa onga eshilipaleko lyokufuta oongunga dhe.

Omupresidente Hage Geingob okwa li gumwe gwomaaleli yaAfrica mboka oshiwike shika ya kutha ombinga moshigongi shokomumvo, hashi ithanwa FOCAC, moka China naAfrica haya uvathana omalongelokumwe gopaliko.

Oshigongi osho tuu shika osha li sha longithwa kuNamibia onga ompito yoku adha etsokumweuvathano ndyoka tali pitike China opo a gandje oshimaliwa shokutamunutha mo okapale koondhila kaHosea Kutako, hoka ke li monkalo ombwiinayi ngashiingeyi.
Nonando inaku tseyithwa kutya China ota ka gandja omwaalu gwiimaliwa gu thike peni, otaku hokololwa kutya Namibia ta ka pewa oomvula ntano dhoshali omanga ina tameka okufuta iimaliwa yaChina.

Okapale kaHosea Kutako oke li monkalo tayi sitha ohoni pethimbo ndika, nomahangano ge na sha negameno lyomatuko goondhila muuyuni oganingi omatilitho kutya ngele Namibia ina pukulula omapuko ogendji mokapale haka, okapale otaka ka kuthwa olisinsa yiilonga yako.
China, nonando e na omapuko mpeya naampeya, unene ngele tashi ya konkalo yaaniilonga yakutwa momahangano gaChina moNamibia, okuume kaAfrica gwoshili.

Iilongo yokUuninginino olwindji ohayi gandja omakwatho kuAfrica ashike omakwatho ngoka ohage ya nomalombwelo ogendji ngoka nakutaamba kwiimaliwa mbyoka e na oku iyutha kugo.
Omalombwelo ngoka olwindji oge na sha nomauthemba ngoka inaga taambwa ko muAfrica, ngaashi omauthemba gomashenge nosho tuu. Omalombwelo omakwawo oge na sha, nokugandja oshiholelwa, nokutaamba ko oongundu dhompilameno mepangelo nande odha li dha dhengwa mo paudemokoli.

China moshikakoliko shotango shomvula ndjika okwa pitilile South Africa onga oshilongo hashi landa iipindi yaNamibia oyindji.
Moshiwike shika otu uvu nkene eliko lyaSouth Africa lya gu pevi noonkondo, shoka tashi vulika shi nkundipaleke omakwatathano gopaipindi pokati ke naNamibia.

Onkalo ngaashi ndjika oyo naanaa tayi ulike kutya Namibia okwa pumbwa a kale nookuume yopaipindi oyendji opo eliko lye lyi kale tali humu komeho.

Shoka epangelo lyaNamibia li na okuninga oku shilipaleka kutya omauvathano agehe gashainwa naChina itaga nyokoma Namibia. Iilongo oyindji muAfrica, omolwa onkalo yoluhepo nondjala, ohayi taamba ko mbala omikuli dhiilongo iinankondo oshoka omuheheli aluhe iha hogolola nenge a gandje omaiyuvo ge pethimbo ta hehele.

Namibia oku na iinima oyindji mbyoka China a pumbwa, omanga China wo e na iinima oyindji mbyoka Namibia a pumbwa.
Ngele iilongo ayihe iyali oyi na shoka sha pumbiwa kushikwao omolwashike mbela Namibia e na oku ulika uumbanda nuukatalume moonkundathan dhe naChina dhi na sha neliko?

Ngele ekwatathano lyaNamibia naChina olya kwatwa nawa nonuukeka, itapu ka kala sha shoka tashi imbi ehumokomeho pokati kiilongo mbika iyali.

Namibia na egulule oomweelo dhe adhihe opo kehe ngoka ta vulu okuyambidhidha oshilongo shetu paliko – kutya nee oAmerica, Britain, China nenge Burundi – a vule oku shi ninga nomwenyo gwa yela.

LEAVE A REPLY

Please enter your comment!
Please enter your name here