Eidhopo mo lyomukuluntu gwelongo lya kwathela osikola kayi pandekwe omakumba

0
106

Nuusita Ashipala

ONGWEDIVA –Nonando pwa li pe na omalimbililo nomayipulo kutya osikola yOndjabayonghalu Combined School itayi ka patuluka molwa aavali sho ya li taya pula opo omukuluntusikola a kuthwe po posikola mpoka, osikola oya patulula omiyelo dhawo nootundi otadhi pula komeho. Shika osha li sha ningwa konima sho omukuluntu gwelongo mOhangwena, Isaak Hamatwi, a li a kutha omasipa pokati koombwa nokupula osikola yi patuluke. “Osikola oya tameka, ashike omu na omilandu dhomeni ndhoka tatu landula opo tu kandule po omukundu nguka momukalo tagu kalelele,” Hamatwi ta ti.

Opwa li uumbanda kutya otapu ka kala evundakano ndyoka tali ka imba osikola yi patuluke, konima sho aakwashigwana yomomudhingoloko nguka ya li ya shanga omukanda tagu shadha omukuluntusikola Julius Kulula. Momukanda ngoka gwa li gwa shangwa momasiku 17 Aguste, aakalimo yomomudhingoloko nguka oya li ya pula omukuluntusikola kaa galukile we kosikola ndjika.

Na inaa gandja uuyelele owundji mboka wu li po, Hamatwi okwa ti oshikondo shelongo shomoshitopolwa otashi longo nuudhiginini opo ku yandwe epato lyosikola ko ku kwashilipalekwe kutya ootundi inadhi piyaganekwa moshikako shika sha hugunina sho osha simana noonkondo.

Onga oshitopolwa shekandulepo lyuupyakadhi mbuka, okwa li kwa tumwa ongundu yaanambelewa ya za kombelewa yelongo osho wo kombelelwa yelelo lyoshitopolwa shaHangwena ya talela po osikola mEtitano manga oosikola dha li inaadhi patuluka mOmaandaha.

Okwa li wo ku na aanambelewa yamwe mboka ya tumwa ko mOmaandaha opo ku kwashilipalekwe kutya ayihe oyi li kolutenda. Ndhoka odha li dha popiwa komukuluntu gwelongo moshitopolwa shoka.

Mboka ye na uuyelele moshinima shika oya ti omakonaakono ngoka ga li ga ningwa mo2013 petameko lyoontamanana ndhoka dhi li po paife otadhi ulike kutya aalongi oya topoka moongundu mbali, moka mu na mboka ya egama komukuluntusikola nongundu yimwe ya gama komukuluntugwoshikondo shiilongwa yontumba, Immanuel Shikongo.

Konima yoomvula mbali, omayipumomumwe ngaka oga dhenge ondalaye noku ya maakalimo yomomudhingoloko, konima sho omukuluntusikola a li a ende omalombwelo gamwene gwomukunda poluha nokutamununa ongandjo yosikola oku ukitha kuumbugantu ndele hakuumbangalantu ngaashi sha li sha uthwa. Mwene gwomukunda, Jacoib Hafeni okwa kala omunashipundi gwelelo lyosikola okuza mo2015.

Shi ikolelela koonzo, kuumbugantu hoka kwa tamununinwa ongandjo yosikola oku na okapomba kaakwashigwana. Taku dhumwa aniwa omukuluntusikola nomunashipundi gwelelo lyosikola ya kala noku tsa itaaya thithi kombinga yomatokolo posikola, onkene aniwa shika otashi yi ehumokomeho lyosikola moshipala.

LEAVE A REPLY

Please enter your comment!
Please enter your name here