Nana Destiny ota minikile ondjila yovanafikola vomoLüderitz

0
29

Tuulikki Abraham

Lüderitz – Endiki loNana Destiny Day Care otali endifa aishe kolutenda mokuyandja omapukululo a wedwa po kovanafikola ovo hava fikola meeprimafikola domodoolpa yaLüdertiz.

Omukwateli komesho pEndiki eli, Peneyambeko Shatilwe, meenghundafana odo a ninga naKundana, efiku eefikola da hovela noshikako sha xuuninwa mOmaandaha oshivike eshi, okwa tumbula kutya omapukululo oo hava yandje kovanafikola ve fike po 24 okudiilila meeprimafikola modoolopa yaLüderitz oidjemo yavo yomakonaakono aAuguste otai shambula neenghono, kakele ashike kovalongwa ve li vatatu ovo inave shi endifa nawa.

“Kwaavo ve li vatatu inave shi endifa nawa, hakutya naana pamwe inava kufa mo sha mwaasho twe va pukulula, otwa didilika kutya efimbo olo ve ya komapukululo ola li lixupi lela. Ovo inave shi endifa nawa ovamwepo ovo ovakulunhu vavo ve va eta komapukululo eshi ekonaakono la li popepi.

Shee vene ihatu longo oinyengandunge, okanona keuye ashike komapukululo oule womafiku manini, ndele noku ka pita ekonaakono, oshinima hasho hashi ende ngaho. Ounona ohatu pumbwa oku va pukulula oule weemwedi donhumba hatu tale nomikalo davo, hatu popi navo pamukalo wehungomwenyo noku va pukulula nee moilongwa oyo tava nyengwa.” Shatilwe osho a tumbula.

Shatilwe ota tumbula kutya endiki eli ohali pukulula ovalongwa, ovo ovadali vavo va didilika kutya ovena ounghundi moilongwa yonhumba oyo itave i endifa naana nawa, nonghendabala yokuvatela omaludalo avo, ounona ngee vadimbuka ohava i koNana Destiny Day Care tai hangika molukanda laAmilema moLüderitz, omo ounona hava pukululwa moilongwa oyo tava nyengwa, noku tonatelwa yoo opo vadule okuma oifiilwalonga oyo va pewa kofikola.

“Ovakulunhu vahapu, ohava kala koilonga efiku alishe, nomudali eshi ta dimbuka te ya keumbo okwa toka, na ita mono naana omhito ya wana yokutala momambo ovanafikola ngeenge pamwe ove na osho va fiilwa ndele inave shi longa. Ovadali vahapu ohava longo keefabulika hava hovele oilonga potundi 06h00 yongula ndele fiyo opotundi18h00 komatango.
Oku koNana Destiny, ihatu va ningile oifiilwalonga yavo, ndele ohatu va pe ashike efimbo la wana, opo vadule okulonga oifiilwalonga yavo, nokuvatela apa sha pumbiwa.” Shatilwe osho a yelifa.

Shatilwe okwa tumbula kutya odula yoneudo ova kala tava yandje omapukululo kovalongwa ve li 24 va hovelele puJanuali novalongwa ve li 11, okudja mefudo laApril tamu wedwa ounona ve li 13, nefiku ofikola ya hovela oshikako sha huunina okwa nyolifa ovalongwa ve li 9 ovo ovadali va didilika kutya inave shi endifa nawa mekonaakono laAugust.

Omudali Helena Nambwele oo naye e na okanona kaye keedula 9 ke li mondodo 3 haka mono omapukululo pendiki loNana Destiny okwa tumbula kutya, okwa pandula neenghono omapukululo oo haa yandjwa kovanafikola, ta ti ngaashi kuye oshi li ekwafo linene, oka nona kaye okakala hakamono omapukululo pendiki opo tuu opo okuhovela eshi ke li mondodo yotete, ashike okanona ohaka piti nawa lela.
“Ame ondi na ounona ve li vane aveshe have uya okumona omapukululo pendiki olo tuu eli, ounona vange kamwe okeli moPre Primary, kamwe oke li mondodo 1, kamwe omondodo 3 nakamwe omondodo 4.

Ounona ohava mono omapukululo nawa shili, ngaashi vamwe ovadali ihatu dulu naana okupukulula ounona vetu ngaashi moilongwa oyo yomalaka okutaakuma, na unene tuu moilongwa oyo yomwaalu. Ame ounona vange ova pita nawa lela, na unene tuu ou eli mo Pre Primary, okwa mona omapukululo e mu kwafela shili, napaife oku shii okulesha nokushanga. “Omudali Hileni Shapota osho a tumbula.
Pendiki apa ope na ovalongi ve li vatatu ovo hava yandje omapukululo kovalongwa.

Endiki loNana Destiny Day Care, nonande li na omulandu wokuyandja omapukululo kovalongwa ovo ve li meeprimafikola, ohali file yoo oshisho ounona okudja peehani di li nhatu, ndele fiyo ounona ovo ve na eedula dili nhano.

Ounona ovo vanini ohava tonatelwa okuhovela potundi 06h00 yongula ndele fiyo opondundi 18h00 komatango. Ovadali ovo hava ka nangala moilonga ndele kape na ou ta dulu okunaganala nokanona meumbo, ounona ovo ohava dulu oku twalwa kendiki loNana Destiny oko va kangale nokufilwa oshisho kovanailonga vopendiki opo.

Nana Destiny okwa yeululile omivelo daye lwotete modula 2016 muJanuali. Shatilwe oku na etumwalaka e li yukifa movadali, ta ti ovadali nave litule mo mokukufa ombinga mehongo lomaludalo avo. “Omudali ngeenge ou wete okanona koye itaka eta oidjemo iwa okudja kofikola, fikama, konga ekwafo opo u yambidide omumwoye a monenwe ekwafo opo tashi dulika yee a dule okuya komesho nelihongo laye.” Shatilwe, osho a tumbula.

Ovalongwa, ovo hava ka mona omapukululo poNana Destiny ovahovela nokuya komapukululo avo oshikako eshi shaxuuninwa shokodula, onghene ova hovela nokuli Omaandaha oshivike eshi, efiku ngaa ofikola ya hovela.

LEAVE A REPLY

Please enter your comment!
Please enter your name here