Omahogololo oga li paveta nopawuyuuki, Kashuupulwa ta ti

0
57

Victoria Kaapanda

OSHAKATI-Ngoloneya gwoshitopolwa shaShana Clemens Kashuupulwa ke uvite ombili kwaamboka taya ende niitopolwa okuhongolola ilyo yoongundu kutya omahogololo kaga li pawuyuuki noga li ge na uulingilingi.

Ngoloneya monkundathana nonzonkundaneki ndjika okwa ti omuleli gwoshilongo Hage Geingob okwa li a sindana onga omutse gwongundu, opamwe nongundu ye yoSwapo ndjoka ya li wo ya mono omahala gane gotango. Omahogololo oga li ga ningwa omvula ya zi ko muNovemba, ngoka ga ningingilwa moshilandopangelo.

Ta gwedha po kutya oku uvite nayi oshoka mboka ye li ompinge nomahogololo, otaya ningi oshinima sha puka oshoka otaya pukitha nokuhongolola oshigwana naamboka kaya li ya thika komahagololo.

“Oshinima sha uvitha ndje nayi unene ooshoka kutya gumwe gomokati kaamboka taya nyenyeta kutya omahogololo kaga li paveta nota kondjitha omayamukulo ga talululwe oku li oshilyo mokomitiye yoSwapo moShana, nelalakano okushololitha, okungwangwaneka oshowo okutopola uukumwe wiilyo yongundu,” Kashuupulwa osho a ti ngaaka.

Kashuupulwa ta ti omapendafule oshowo iilyo yomutumba gwopashigwana, Nahas Angula, Jerry Ekandjo oshowo Pendukeni Iivula-Ithana mboka ya li methigathano lyomahogololo, kaye na uupyukadhi noya li ya taamba ko iizemo yomahogololo nokupandula Hage Geingob.
Omukwatakanithi gwongundu yoSwapo moshitopolwa shaShana Samuel Nelongo okwa ti ombelewa ye oyi shi iilyo yongundu mbyoka tayi hongololo nokupukitha aakwashigwana miitopolwa ya yooloka kutya opwa li pe na uulingilingi pomahogololo nomayamukulo oga pumbwa kutalululwa.

Samuel ta ti ombelewa yawo itayi vulu okuyamukula omapulo kombinga yiizemo yomahogololo oshoka, omulandu ogu li po kutya omawupyakadhi ge li ngangaka ohaga konaakonwa nokukandulwapo kaaleli yoshilongo yopombanda.

LEAVE A REPLY

Please enter your comment!
Please enter your name here