Ondjila yahugunina yekondjelomanguluko lyaCuba nonkalamwenyo yaFidel

0
33

Constancio Hishiyukifa Mwandingi

Omaandaha gomasiku 13 Aguste 2018, Fidel Castro Ruz, omuleli a simana gwaCuba, ngeno okwa gwanitha oomvula 92. Fidel, ngaashi osho a kala hi ithanwa ngaaka kumboka ya li ye mu hole muuyuni, okwa li a kwatela komeho olweetho lwahugunina lwekondjelomanguluko lyaCuba okupitila moshikonga sho26 July Movement, shoka sha tameke okuunganeka Aacuba papolitika nelalakano lyoku umba ko epangelo lyuukayamukulwa lyaFulgencio Batista ngoka a li ha yambidhidhwa kepangelo lyaUnited States.
Sho Fidel pamwe naagundjuka yakwao Aacuba ya dhimbulula kutya uukayamukulwa waBatista itawu ka kandulwa po pamukalo gwopambili, oya li ya tokola ya kuthe iilwitho noshikonga shawo shotango shopakwiita osha li eponokelo lyoMoncada Garrison mo26 Juli 1953 moSantiago de Cuba.

Fidel ye mwene okwa li a hupula omwenyo gwe sho a kwatele komeho ongundu ndjoka ya ponokele Moncada Garrison, ongoshizemo ye nayakwawo yamwe oya ka kwatwa po, mwa kwatelwa mumwayina Raul Castro Ruz, noya li ya tulwa mondjedhililo kokantuntu kaPines, hoka ka ka lukululwa konima ka ka ninga okantuntu kaanyasha, moka uunona omayovi naagundjuka Aanamibia, mwa kwatelwa omushangi, ya li ya tumwa ya ka hite oosikola, unene tuu konima yoshiponokela shaCassinga mo1978 shoka sha li sha ningwa kepangelo lyokatongotongo moCassinga moAngola.

Konima sho ya li ya mangululwa okuza kokantuntu kaPines, Fidel okwa li a kwatele komeho aagundjuka Aacuba ya yi kuupongekwa koMexico moka ya li ya ki ilongekidhulula nokugalukila moCuba mo1956 ya tsikile okulwitha Batista.
Sho ya galuka oye ya nosikepa onkulu yedhina Granma, ayehe 82 ya thinana mosikepa yo yaa na iilwitho yothaathaa. Gumwe gwomuyo okwa li a gwile mefuta nolweendo lwawo olwa li lwa kalekwa manga kuFidel opo ya ninge onkambadhala yokuhupitha kuume kawo. Oshiningawnima shika osha li sha yi oompangela dhawo moshipala oshoka osha kateka okuthika kwawo komunkulofuta gwaCuba, shoka kwa li kwa dhilaadhilwa shi ki imbotse noshikonga shi li ompinge nepangelo shoka sha li tashi ningwa meni lyoshilongo, shoka sha li sha kwatelwa komeho kuFrank Pais, ngoka oye a li omuleli meni lyoshilongo gwo26 July Movement.
Onkene omutondi okwa li e shi pondola okusinda mbaka yomoshilongo shoka sha li sha eta epangulo osho wo eso lyaFrank Pais mo1957. Omutondi okwa tsikile nokuponokela ongundu yooFidel sho ya thiki, oshiponokela shinyanyaleka shoka sha thigi owala aashona yomaantu 82 ya hupa.Mwaamboka ya hupa, ye li omi-21 lwaampoka oyo ashike ye shi pondola okuthika koondundu dhaSierra Maestra muDesemba 1956 nayahamano mo1957.

Mokati kaamboka ya hupa omwa li mwa kwatelwa Fidel, mumwayina Raul, omuArgentina Che Guevara, ngoka a li a kutwa kuFidel moMexico, osho wo yalwe mboka ya li ya ka holama moondundu dha Sierra Maestra opo ya tsikile okukondjitha omutondi.
Elago enene aantu yaCuba mboka ya li ya loloka uukayamukulwa waBatista, oya wayimine Fidel nokangundu ke koolebele nokutholoma po ongundu onene ndjoka ya ka umba ko epangelo koshipundi muJanuali 1959, shoka sha thindikila Cuba melunduluko enene, shoka America ka li e shi nyakukilwa oshoka osha li sha piyaganeke omalalakano ge moCuba.

Okuza mpoka, Fidel naCuba oya kala aashonekwa yeso neyonagulo komutondi sigo omeso lye mo2016 mepipi lyoomvula 90.
Fidel omuleli ngoka a nwetha mo ondjokonona momukalo itaagu yelekanithwa naantu oyendji. Okwa hupa momaponokelo ogendji e ga ningilwa komutondi nokwa hupitha Cuba kaa halakanithwe po.
Andola uuyuni nonkalamwenyo oya li yi na uuyuki, andola Fidel okwa mona omapapa ogendji guupendafule, kali shi limwe ashike ogendji, oshoka okwa kwathela okuninga uuyuni wu kale uuhwepo

Monena Cuba oku na onkalo yelongo nuundjolowele dhingi muuyuni. Kamu na okwaa shi kulesha moCuba mo kamu na omikithi dhondjala. Ashihe shika oshe ya pethimbo lyelelo lyaFidel.

Sho twa tyapula oshituthivalo oshi-92 shaFidel momasiku 13, tse moAfrica, unene tuu moNamibia, otu na okutumbaleka onkalamwnyo yaFidel Ruz Castro sho a kondjele emanguluko lyetu osho wo uuntu womuntu sho e tu pe uuthiga uuwanawa welongo kaagundjuka yetu.
Oyendji yomutse mboka twa li tu na ompito yoku ilonga moCuba nena otatu longitha uunongo wetu okutunga oshilongo shetu, shika tatu shi pandulile kakukutu komatanga Fidel Castro Ruz naantu ye mboka ye tu longa osho wo ya kondja pamwe natse moku adha ombili moAngola, emanguluko lyaNamibia osho wo okuhulitha po epangelo lyokatongotongo lyaSouth Africa, onkene a eta emanguluko muumbugantu waAfrica.

Mo1978 sho nda li natango moCuba, Fidel okwa li a popi kombinga yemanguluko lyaNamibia pwaa na omalimbililo osho wo ehulithopo lyokatongotongo, shoka tashi ulike omadhilaadhilo ge omawanawa.
Enda po nawa kakukutu komatanga!

LEAVE A REPLY

Please enter your comment!
Please enter your name here