Tatu ontamene mOlufuko

0
93

Ignatius Nambundunga

Ngele tashi ya komuthigululwakalo, aantu oyendji, unene tuu epupi lyopokati, otu li monkalo yaa na omidhi. Otundjitundji otu li mekano omutse nothingo, naamboka twaa mo, omo tu uka, ngiika tatu ningi shoka haku tiwa naandjoka yi li monima omoshigunda tuu yu uka. Oho ningi tuu komuthigululwakalo wa hala kuyama, ngoye ope na mboka ta ye ku ngambeke, sho tuu to hala wu gu thige po thiluthilu, ngoye natango ope na iinima mbyoka tayi ku hilile ko. Ano onkalo ndjika yaa na omidhi oya vuka mokati kAanamibia oyendji, osho wo mAafrica itaaya vulu okuyalulwa. Omasiku hamale ga piti, opwa ningi omasiku pe na oonkalangogo niita yopakana.
Onkalo ndjika yaNankali kohi Nangombe kombanda oya li ya etwa molwoshiindingili shoka shi li muumbangalantuninginino waNamibia.
Oshituthi shika sha li sha kutha oyendji moomvugom nomokalungu osha li sha ningilwa mOutapi moshitopolwa shaMusati. Ngiika otashi wapa oshoka oshitopolwa shaMusati egumbo lyomihoko odhindji dhAawambo. MOmusati otamu adhika Aakwambi, Aakwanyama, Aangandjela, Aakwaluudhi, Aakolonkadhi, Aambandja nAambalantu. Ashike nonando ongawo, ope na omapulo ogendji kombinga yolufuko. Nonando omapulo ngaka ga tanganana ga tala omushangi moshipala, moshinyolwa shika otamu ki ipyakidhilwa naashoka hashi ningwa po paufupi pethimbo lyolufuko, ndele itashi ka yamukula nando epulo ngele olufuko otalu opalele pethimbo ndika nenge aawoo.
Olufuko olwa kala ko nalenale muuyuni wooNembulungo lyaNgwedha, ndele kashi shi oshinima oshipe.

Olufuko osha za koshitya okufukala. Shi ikwatelela ku Taipannen, ota popi kutya okwa kala omalufuko gaali mOmbalantu, lumwe olwAambalantu, nalukwawo olwaakadhona yAakwaluudhi. Otaku hokolwa kutya mUukwaluudhi kamwa li Namunganga ngoka ta fukaleke, onkene haye ya okufukala kOmbalantu, taya ningi omushiinda esipa lyothingo, shika osha li hashi ningwa okuuka pomwedhi Aguste lwaampoka. Osha li oshinakugwanithwa shooyina yaakadhona momagumbo, ya dhimbulule, ya koneke nokukonaakona ngele aanona yawo oya thika methimbo. Nuuna kwa dhimbululwa kutya eeno odhoshili, nena omukulukadhi oku na okulombwela omushungu gwe kutya ya kokitha. Omusamane oye e na oonkondo okutokola ngele omvula ndjoka omona ota yi a ka fukale. Nuuna etokolo ndika lya ningwa, omalongekidho ga kwata miiti ohaga holoka shili. Ohaku kongwa onduwi, ndjoka hayi gogwa oshindhe opo yi kale tayi fuula yo ya tiligana ya fa Amusha opo tali zi momvugo kuuzilo. Ongaya ohayi tulwa mo, osho woo iilangeka yokutsa uusila wokuteleka oshithima ohayi endeleko okanamundonda.

Opo omukadhona a taambwe molufuko, oku na okufuta, iifuta mbika oya li omatemo osho wo omihanga ndhoka dha ningwa miipeta gomayi gompo. Etemo olya li hali gandjwa onga endhindhiliko lyokudhimbulutha aakadhona iinakugwanithwa yawo yiilonga yomepya.
Sho nee tashi ende tashi fuluka ko ngeyi, aakulukadhi mboka ye na ehalo nohokwe oyana yawo ya ye kolufuko ohaya endele egumbo hoka haku fukalelwa uuyenda, uuyenda mbuka owa li tawu ithanwa taku ti olufuko lwa fala omakaka. Oshoka muutsilo wawo oya li haya tula mo omakaka gaali, oya li haya thigi ko uutsilo mbuka, opo ihe konima haya ka pewa omulombo kutya olufuko olu li ko uunake. Uuna ndhika tadhi nyuwitha omakutsi dha thiki, aakuluntu yomukadhona okwa tegelelwa ya lombwele aakwawo yomukadhona koombinga adhihe, ano kelugo nokoohe. Omulumentu ngoka a tegelelwa a ka ninge po gwomukadhona naye ihadhi mu ende pomunkulo, nuuna kakadhona kee na omulumentu, ohapu kongwa nduno okamatyona hoka taka keelele po, ano kwa kwatelwa ashike miimbaba manga oontungwa tadhi tungwa.

Mesiku lyotango aafuko ohaya ilongekidha, ohaya tsu wo uusila mboka tawu adha kesiku etiyali. Esiku etiyali olyo hali kala iiti tayi teka, oshoka omumati ngoka e na ehalo lyokukutha po okakadhona oha holoka nookuume ke, oondjimbo ohadhi kala dha pandeka, moka haya imbi taya tanga omumati, ta ye mu popi kedhina, ta ye mu tumbula mpoka ha zi, taye dhi mbwafula mo mpoka ha longo nosho tuu. Mesiku etitatu aakadhona ohaya yi nduno hoka taku ka ningilwa olufuko, ohaya yi niinkumbi yawo, ookuume kawo osho wo nuunona uushona wa landula mo wu li monima. Mbaka ohaya kwathele okuhumbata omitenge dhomufuko. Uuna ya thika, aafuko ohaya yi yu ukilila mondjugo. Ashike mondjugo ihamu liwa naana, ohaya kala mo uule womasiku gatatu moka haya makele ashike, yo taya nu omalovo ga tulwa iigwanga. Ope na omipopyo kutya iigwanga oyo ku kwashilipaleka omukudhona opo a ka mone oluvalo, ashike omapopyo gamwe taga zi pomunkulo otaga ti iigwanga otayi kwathele mokusinanana nokusimonona mboka ye na omapunda. Konima yomasiku gontumba, Namunganga oha pititha mo aafuko, nohe ya fala pehalandjandja mpoka haya kala taya tanta omutenya aguhe manga Amusha ti ipolithile komalutu gawo. Oshoka oye li omagundji kondje, osha li oshipu okudhimbulula kutya olye e na epunda.

Mpoka aafuko ohaya pewa omagano, nohapu kala pe na enyanyu lyambishi megumbo mwa tselwa uuna omufuko a pita koshilolelo shika. Konima yolufuko, omulumentu ngele okwa pyakudhukwa okwa li ha ka tala ko omufuko gwe.

LEAVE A REPLY

Please enter your comment!
Please enter your name here