Anglo American Namibia Foundation ota wapaleke eenhele dehongo mo//Kharas

0
17

Tuulikki Abrahama

Lüderitz – Ehangano loAnglo American Namibia Foundation (AANF) otali pula komesho mokuxwepopeka eenhele dehongo moshitopolwa sha//Kharas. Oshivike sha ya ehangano loAANF ola yandja pambelewa ongulu yoku ongalela poprimafikola poDiaz moLüderitz. Ongulu yoku ongalela oya wapalekulululwa nokutulwa pamufika u li nawa, mwa tulwa oundjuo oshoyo onhele yokutelekela.

Pefimbo ta yandje pambelewa ongulu yoku ongalela pofikola poDiaz Primary School oshivike sha ya, omukwatakanifi wehangano loAANF Richard Cook okwa tumbula kutya oshishonekwa shehangano loAANF osho okuxwepopeka eenghalo dovakwashiwana ovo va kala va mona oixuna monakudiwa, paku va kwafela meeprojeka da yooloka, ngaashi unene mehongo, moundjolowele nomokundjeka po omangeshefelo opetameko.
Cook okwa tumbula kutya ewapalekululo longulu yoku ongalela poprimafikola poDiaz ola dula okuningwa konima eshi omukulunhufikola a ninga eindilo odula ya ya, newilikongudu lehangano loAANF ola yandja edimino muDecember 2017 opo ongulu yoku ongalelala i wapalekululwe nokutulwa omayakulo ngaashi ondjuwo oshoyo onhele yokutelekela.

Pefimbo ta tambula ko pambelewa ongulu yoku ongalela, omukulunhu wehongo moshitopolwa sha//Kharas Johanes //Hoeseb okwa pandula ehangano loAANF eshi tali kendabala okuxwepopeka eenhele dehongo moshitopolwa sha//Kharas.

Ta tumbula kutya ehangano eli ola kwafela moku wapalekulula ongulu yoku ongalela nokutula mo oundjuo poMarmer Primary School moAus. Ta tumbula kutya ehangano olo tuu eli ola wapalekulula endiki lovanafikola moAus, omo ovanafikola okudja keembinga neembinga moshitopolwa hava dulu okuongala omafimbo nomafimbo va dule okukundafana nokupukululafana moipambele yehongo.
Ehangano olo tuu eli loAANF odula yoneudo ola tula omafiya okuteleka eli 10 noiyakulifo aishe mongulu yokulongela ovalongwa oshilongwa shokuteleka poAngra Pequena Senior Secondary School moLüderitz.

//Hoeseb ta pandula ehangano loAANF eshi le litulamo mokutula eenhele dehongo pomufika u li nawa, okwa indila ovalongifikiloa novalongwa poDiaz Primary School va kwate noukeka omayakulo oo va pewa e li pomufika u li nawa pakukaleka etungo noiyakulifo aishe ya yela.

LEAVE A REPLY

Please enter your comment!
Please enter your name here