Erongo lya tyakaleka iitopolwa iikwawo noongonyo

0
22

Shipi Elago

Ongwediva – Osipana yaadhengingonyo yoshitopolwa Erongo oya li ya pe iitopolwa iikwawo mbyoka ya li ya kutha ombinga muudhano woongonyo waadhani aashona wopashigwana mboka wa li koshitopolwa shaZambezi ehuliloshiwike lya zi ko.
Erongo olya li lya fadhuka po noombandi dhoshingoli heyali, oshisiliveli shimwe osho wo oombandi dhoshikushu dhi li ndatu nokapandi koN$5000.

Khomas okwa li e ya puutiyali moka a li a likola oombandi dhoshingoli ne, oshisiliveli shimwe nosho wo ombandi yoshikushu yimwe.
Ohangwena oya li ya toola po ehala etitatu moka ya li ya pondola okumona oombandi dhoshingoli ndatu, nombandi yoshikushu yimwe.
Zambezi okwa li a toola po ehala etine muudhano mbuka moka a li a likola ashike oombandi dhoshisiliveli ndatu nodhoshikushu mbali.
Oshitopolwa kehe sha kutha ombinga osha li sha mbendekwa okapandi koN$2000, omanga aadhani ayehe mboka ya mona oombandi dhoshingoli ya li ya mbendekwa kehe gwumwe okapandi koN$500.

Joy Nangolo gwokErongo oye enyakwa dhingi lyoshiviha shookilogalama 48, omanga Ndevelo Tryangain gwo kOhangwena oye a li a tothwa mo onge omudhani dhingi moshiviha shoookilogalama 60.
Uudhano mbuka owa li wa kwashilipalekwa kehangano lyoKamunu Holdings, ndyoka lya li lya humbata po oshinakugwanithwa okutula omahooli moombetsa dhepangelo nokufuta aahingi yoombetsa, iikulya yaadhani, omulalo osho wo okusila aanambelewa mboka ya li taya wilike uudhano mbuka oshipwiyu.

Omugandjimulombo gwehangano lyoongonyo moNamibia Robert Pendapala Haihambo okwa li a holola nkene ehangano ndika lya li lye ya kutha koshiyalo, noku enditha nawa uudhano mboka olwindji wa kala wushiwikile ashike moshilandopangelo.
Okwa ti iitopolwa 10 oya li ya kutha ombinga muudhano mbuka omanga iitopolwa ngaashi Oshana, Otjozondjupa, //Karas kaya li ya kutha ombinga, Hardap ke na natango omutungilo gwobokisa onkene naye muudhano mbuka ina dhumwa mo.

Uudhano mbuka ohawu unganekwa omumvo kehe moshilongo okupitila mongongahangano yokudhenga dhaKahandja noshikando shika owa li wa dhanenwa koshitopolwa shaZambezi konima sho wa li wa waningilwa mondoolopa yaRundu omumvo gwa zi ko.
Kakele koKamunu Holdings uudhano mbuka owa li wo wa tsuwa epepe komahangano ngaashi Vita Juice, De Vrye, FNB, OTB Sport & Trophy naAir Namibia.

Aabokisi ye li ethele ya za miitopolwa 10 moshilongo oya li ya kutha ombinga muudhano mboka wa li wa dhanwa muule womasiku gaali, mboka wu li oshitopolwa shomapendulepo gwobokisa moshilongo.

LEAVE A REPLY

Please enter your comment!
Please enter your name here