Nekundi a nongeke nokutsa omukumo aalongwa

0
51

Victoria Kaapanda

OTAMANZI-Omupeviminista gwomahangano gepangelo oshowo oshilyo shomutumba gwopashigwana Veikko Nekundi okwa li a gandja omalongo oshowo okutsa omukumo aalongwa yondondo 10 moshikandjohogololo Otamanzi moShitopolwa shaMusati, oshiwike sha zi ko.
Nekundi okwa li a popi kutya okwa li a tseyithilwa kutya aanasikola oya taalela omashongo ogendji ngaashi okuya miihulo naanasikola aakwawo, okuninga omapunda omanga ye li mosikola, elongitho lyiikolwitha, oombepo dha kaka omolwa okuume ya puka, ondjala, iimbuluma, omatukano, okuthiga po osikola oshowo elongitho lyoongodhi pethimbo lyosikola.

Nekundi okwa li a gandja omalongo kaalongwa yondondo 10 kohi yoshipalanyolo “Dhiladhila, itula mo e toshi pondola”.
Okwa li a fatulula ta ti omunasikola oku na okudhiladhila tango shoka a hala okukala monakuyiwa. Ye, na kale e na eitulamo nomukumo gwaashoka ahala okuninga monakuyiwa, nena nondjila ye ndjoka a pala nayo otayi kala ya yela nok pondola shoka a hala.
Omunasikola ngoka e na elalakano nena okushi shoka a hala okuninga monakuyiwa ye, no ke na siku a ndope, oshoka okushi shoka a hala ye ota longo nelalakano oshowo neyitulemo. Omuntu oha teya shoka a kuna.

“Tu kaleni twa feni omadhila gomakodhi ngoka ihaga tila uudhigu kehe mboka tawu ya komeho gawo, uumbanda nawu zemo museni ihe tatu kaleni nombepo yokutya otatu shi pondola monkalamwenyo”. Nekundi ta ti ngaaka.
Nekundi ta ti inaya etha nande ya teke yo yi itule mo miilongwa yawo, omanga ethimbo ye li na lyi li nawa yo ya tokole shoka ya hala monkalamwenyo nomonakuyiwa yawo.

Ta kumagidha aanasikola yondondo 10 kutya kuume yawo naya kale omambo gawo gosikola, yo taya kala ya itula mo ngele taya longwa. “Ngele owu na elalakano opo ashike to shi pondola okuya kongundu 11, ngele owu na omukumo nena owu na oku shi enditha nawa mekonaakono lyoye ngele to lesha”.Nekundi ta ti ngaaka.

Ta gwedha po ta ti aanasikola naya leshe ya itula mo , ngoka a li ine shi enditha nawa miikako ya pita ompito oku yi na natango, inaya sholola nando opo ya vule okuya kongundu 11. Naamboka ya li ye shi enditha hwepo natango naya gwedhe ko kwaashoka ya li ya longa.

LEAVE A REPLY

Please enter your comment!
Please enter your name here