Oku adha omapotokonono naanafaalama kashi shi oshinima oshinene: Omolwashike oshidhigu?

0
22

Omuntu a za hoka a za, a za kuuyuni wulwe, okwe ya mondunda e ta lombwele mboka ya kala mo nale momudhingoloko ngoka ethimbo ele ya longithe omikalo dhilwe dhi ili. Shi ikwatelela pamadhilaadhilo gomuntu, ope na ompito onene oshizemo shi kale itaashi shambula.
Aantu otundji otwi ika omikalo ndhoka hatu longo nadho, nomathimbo ashike gamwepo hatu kala twa hala elunduluko. Otwa hala wo natango oku uva uuyelele kombinga yelunduluko okuza kumboka twi inekela yu uve ko omashongo getu, noshinima shika inatu shi tegelela oku shi mona okuza kaaheni.Ngele omuheni ngoka okwe ya nekandulepo lya za kondje tali kandula po uudhigu awuhe poshikando, ashike omukalo gwekanduklepo ndyoka itagu ulike omaitaalo getu, omikalo nomangambeko gomudhingoloko gwetu, ompito yongeshefa kehe yi mone omalunduluko oya thinana noonkondo. Ashike muunamapya, aanafaalama aashona ohaya tyapula embomboloko lyaayeni olundji, ye na omikalo ominene dhokukandulapo omaupyakadhi, taya kuthwa palwe. Omukalo nguka gwoku eta elunduluko okuza pombanda wu uka pevi: “otatu ya po neyamukulo komaupyakadhi shi ikwatelela komikalo dhuuyuni tse tatu ku lombwele shoka tu na okuninga.”

Ashike aanafaalama oye na owino dhingi mokumuna, noomvula omilongo nomilongo dhendopo osho wo eyo komeho odha kala nale nokulundulula omukalo nkene aalundululi taya longo mokudhimbulula oshinima shoka. Ashike omahangano inaga yama komapangelo taga tameke okuninga omakwatathano menenvi naanafaalama oomiliona moka omo mwi ikolelela onakuyiwa yaAfrica, omulandu gwokukanduka po omikundu dhaanafaalama aashona taku longithwa oongamba ndhoka dhi li po ngashingeyi hadho shikwetepo. Ashike osho sha pumbiwa.
Pehala lyaashoka, elundululo lyuunamapya muuyuni olya kwatwa komapopyo gaafele. Okukandula po uupyakadhi womunafaalama omushona ohashi ithanwa eidhopo mo. Nomaidhopo mo ogi ikwatelela momathano omanene gooteori nekandulepo lyoluhepo ndyoka tali eta omapotokonono ngoka ga tungwa noga kuthwa kondje yomafuta. Ashike oshili osho shika kutya omukalo nguka gokukandula po okuza pombanda wu uka pevi muunafaalama oge li ompinge nuukwatya waantu, notagu pataneke onkalo yoshili noyopaife kaanafaalama, mboka taya ikolelele moompango nooteori.

Omulongwantu omuBritain Robert Chambers ota popi kutya iizemo oya kala ngeyi kutya omikalo ndhoka dha tulwa miilonga komahangano gokuninga omapekaapeko gopauyuni ihaga pe aanafaalama aathigona oomawuwanawa. “Shika omolwa kutya oonkalo moka aanafaalama haya longo ohadhi tula po oongamba nkene ye na okumona mo uuwanawa,” Chambers ta popi membo lye (Whose reality counts?).
MoSouth Africa, oshiholelwa sha tsa osha li opolohalama tayi ithanwa Accelerated and Shared Growth Initiative of South Africa (AsgiSA) ndjoka ya li ya tulwa miilonga moshilongo ashihe kehangano lyoIndependent Development Trust, inaali yama kepangelo, ndjoka ya li ya ndopa olangu okumona omalunduluko kaanafaalama.

Edhilaadhilo enene olya li okunenepeka omalindithilo gaanafaalama, mokukwata ko oofaalama adhihe momukunda nokulandithila iilikolomwa mumwe taya landitha pehala lyaanafaalama nokushuna mo ovenisa yoopelesenda 90 mokukuna komumvo tagu landula, omanga aanafaalama taya topolelathana oopelesenda 10.

Ashike sho ehangano ndika lya longo nomukalo gwokulela omukunda aguhe onga ehangano limwe, olya kaleka wo aanafaalama kondje yomusinda ngele tashi ya kokuninga omatokolo. Onkene aanafaalama oya ka tinda elongitho lyomapya gawo pamukalo nguka nopolohalama oya li ya ndopa. Tashi kumitha, aanafaalama kaya li ashike nando ya hala okulelwa kehangano ndika ya pewa.
Ashike omukalo nguka gwokuya mo nolonga omo gu li natango momalundululo guunamapya moAfrica, moka omahangano ngaka inaga yama kepangelo olundji haga ndopa okukundathana nokukwatathana naanafaalama pontsapo yopolohalama opo ya nduluke po omakandulepo gomaupyakadhi nomikalo ndhoka dha thikamena po onkalo yaakalimo.

Neyooloko enene, omukalo gwaanafaalama tango, ngoka gwa tseyika nawa onga omukalo gokuza pevi wu uka pombanda, ogwa ulikwa hagu eta iizemo ya yooloka thiluthilu.

Omikalo ndhika ohadhi mono omahangano taga longele kumwe naanafaalama, taya yi moonkundathana nayo tango, taya tala komashongo gawo, opo ihe taku etwa po omikalo dhokukandulapo omawupyakadhi pamwe nayo. Nomukalo nguka gwekuthombinga, aanafaalama oya kwatela komeho mokuninga omathaneko, omayalulo goshimaliwa, etulomiilonganga osho wo ezulo lyoopolohalama.

Nonando natango inagu ihalakanena moAfrica, omukalo ogwa ulikwa gwa longa moUSA, moIndia, Zimbabwe osho wo moEthiopia. MoIOWA, USA, ehangano lyoPractical Farmers of IOWA (PFI) ohali kwatathana naanafaalama okutotha mo kutya omapekaapeko genipo ga pumbiwa.
PFI ta imanga ihe kumwe naapekaapeki ya ninge omasinanano moka aanafaalama naapekaapeki haya tula kumwe oonzo, ngaashi ethimbo nevi. Aanafaalama oyo haya kwatele komeho omapekaapeko, onkene oyi itula mo musho. MoZimbabwe, ehangano lyedhina Intermediary Technology Development Group (ITDG)/German Agency for Technical Cooperation(GTZ) Civil Food Security Project olya li lya totwa po molwompumbwe yiikulya miitolwa mbyoka yi li moshitopolwa mwa kukuta.

Opolojeka oya tameke nokutala omangambeko gonkalo yiikulya. Aanafaalama oya li ya kutha ombinga mokutotha mo omapotokonono, omathaneko osho wo okutota po ondjila ndjoka ye na oku enda okukandula po uupyakadhi mbuka. Aanafaalama oya hogolola nokuninga omalolelo nomikalo ndhoka ya hala.

Oya tsakanene wo yi inike komilungu kombinga yiizemo osho wo omaupyakadhi ngoka ya palamena, noku ya po wo nomikalo dhokukandula po omaupyakadhi ngoka.

Elunduluko olya eta aanafaalama mboka ya li aathigona noonkondo taya landa oongombe dhawo. Onkene, osha simana opo oopolohalama dhomalunduluko gopaunamapya dhi longithe omikalo ndhoka tadhi longo. Momutumba ngoka gu li ko pethimbo ndika gwaanafaalama gu li koKigali shaRwanda, omukalo gwaanafaalama tango nagu kale ogwo gu li tagu tip ii.

LEAVE A REPLY

Please enter your comment!
Please enter your name here