Omalongekidho goshituthi sha The Dogg shahugunina oge li kolutenda

0
235

Pinehas Nakaziko

WINDHOEK –Martin Morocky, ngoka a tseyika nedhina moongalo The Dogg, onkene e li te shi enditha nawa ngele tashi ya pomalongekidho gwoshituthi she shahugunina moongalo.

Oshituthi shika otashi ka dhanenwa pokapale ketanga koshiputudhilo shopombanda shaayilongi shaNamiba (Unam), mu Sepetemba 29.
Momalongekidho goshituthi ngoka ge li metifa, The Dogg okwa li ishewe a tula uukuni kumwe nomahangano omanene moshilongo ngaashi Air Namibia, NBC, Poiyah Media, osho woo oshifokundaneki shoConfidente opo ayihe yi kale ya enda nawa.

Oshiwike shika The Dogg okwa li ishewe a tseyitha omuhikingalo ngoka omuTanzania gwedhina Diamond Platnumz oye taka kala omuhikingalo ngoka a za pondje yoshilongo taka mwenyeka poshiindingili shika. Diamond oye omwiimbi ngoka e holike kAanamibia unene mwolwoongalo dhe ndhoka dha dhenga mbanda. Omwiimbi nguka oku li ishewe e na omapapa ogendji kedhina lye, unene tuu ngoka goChannel O.

Kakelwe kwaashoka, The Dogg oku li ishewe a tseyitha aahikingalo yamwe mboka taya ka mwenyeka pamwe naye ngaashi Sally, Tswazis naTate Buti, okutumbula po ashike yamwepo.

Oshituthi shika shaThe Dogg okwa tengenekwa shi ka nane engathithi lyaatali ya adha 12 000, naThe Dogg okwa ti shika oshiindingili tashi ka eta po ombili pokati kaahikingalo aape naambaoka aakulu mehangano lyoongalo.
Oshiindingili she sha hugunina shoka sha li sha tseyithwa moshilongo omasiku hamale ga piti, osha landula sho The Dogg a li a tseyitha omvula ya zi ko kutya ye ita imbi we, nota ka tala ishewe moongeshefa dha yoolokathana. “Nando oongawo, okuninga oongalo otaku kala oshinima sha simana monkalamwenyo ye.

The Dogg okwa li ishewe a pandula omahangano omakwawo moongalo sho ga kala nokukambadhala opo ga hedhidhe ehangano lyoongalo moshilongo pamuthika gwopombanda.

“Natu tsikileni okutula uukuni kumwe, sigo ehangano lyoongalo lya thiki pondondo ndjoka yopombandanda,” The Dogg ta ti ngaaka.
Kakele kwaashoka, The Dogg okwa tseyitha ishewe tapu ka kala okatanga kokoompadhi, mpoka pe na ekopi tali ka kondjelwa.  Uutekete otau ka landithwa kombiliha okuza pooN$50.00 sigo N$500. Omiyelo otadhi ka patuluka okuza po11h00 sigo onakemufaalele.

LEAVE A REPLY

Please enter your comment!
Please enter your name here