Ombelewa ya!Nami#nus ya tokola okukufa ovanhu momapandavanda

0
28

Tuulikki Abraham

Lüderitz – Ombelewa yoshikandjohoololwa sha!Nami#nu, oya faneka tai ka longifa oshimaliwa sheeN$39 000, opo i ka futile ovalumenhu ve li 14 va ka mone omadeulo opetameko e na sha neameno koshiputudilo shokudeula ovanailonga vomefuta sho Namibian Maritime and Fisheries Institute (NAMFI) moLüderitz.

Kansela woshikandjohoololwa sha!Nami#nus Jan Scholta, okwa tumbula kutya, eyambidido eli ola dula oku holokapo eshi ovakwashiwana vahapu va ninga omaindilo kombelewa yaye, va mone eyambidido opo va mone evatelo lokufuta omadeulo oule woshivike shimwe, oo haa pula eeN$2800 momunhu umwe oule woshivike.

Scholtz ta tumbula kutya fiyo opapa, omaindilo ashike manga ovanhu ve li 14 a nyamukulwa shaashi itava dulu okufutila ovanhu aveshe.
Ovo va mona elao eli ve li vahetatu otava hovele omadeulo avo moshivike tashi ya, okuhovela 17 -21 September poNAMFI moLüderitz.
Jaco Mcky oku li umwe womwaavo va mona elao eli, ota tumbula kutya okwa pandula ombelewa yoshikandjohoololwa eshi yanyamukula keindilo lavo.

Okwa tumbula kutya,ngee ova mono omadeulo opetameko ena sha neameno nokumona odjapo , nena ota shi ke va pa omhito va dule okumona oilonga meembautu, shaashi osha pumbiwa omunhu u kale wa mona omadeulo oludi eli opo u dule okumona oilonga meembautu.
“Otwa pandula omufimanekwa eshi wa kwafela ovanhu vomoshikandjohoololo shoye, pamwe omhito ei otai ka yeulula ngaa omivelo opo tu dule okumona oilonga.” Theofilus Awala oo naye a mona omhito ei osho a tumbula.
Josef Kalimbwele, oo naye a mona elao eli ota ti kutya omhito ei va pewa otave ke i longifa noundalapata opo va ka hovele omadeulo aa noku a pita, va dule okumona omikanda odo tadi dulu oku ke va pefa oilonga va dule oku eta omboloto komaumbo avo nokeefamili davo.

Kalimbwele okwa twa yoo vakwao omukumo, opo ve litulemo momadeulo oo tava ka hovela, ve litulemo voo vaha faule nande, ta ti omhito ya tya ngaha kai shii nande okuhunwifwa.

Kansela Scholtz okwe va kunghilila yoo opo va longife omhito yatya ngaha, vaha faule nande okuya komadeulo, voo vaha hepife oimaliwa yepangelo oyo tava futilwa.

Okwa tumbula kutya, oshimaliwa osha yandjwa nelalakano longhendabala yokukufa oshiwana momapandavanda. Scholtz okwa tumbula kutya, omahangano okuyula eeshi modoolopa otaa ende taa humu komesho, nongeenge taa ka pumbwa ovanhu vokulonga meembautu , nena otaa ka kuta ovanhu ovo va mona omadeulo.
Ovanhu ve li vahetatu otavahovele omadeulo avo moshivike tashi ya novanhu vahamano ottava ka hovela omadeulo avo moshivike sha huuninwa shaSepetemba.

LEAVE A REPLY

Please enter your comment!
Please enter your name here