Oministeli yomaudhano ya yi moshipala oshiindingili shokwiiyuvitha nawa

0
15

Loide Jason

WINDHOEK-Oshigongaleleinyanyudho shaaniilonga muunministeli womaudhano naanyasha shoka sha li sha tegelelwa shi kale ko okuza nena (mEtitano ) osho sha kalekwa manga.
Oshigongi shika osha li aniwa tashi longekidhilwa moWindhoek moka kwa li kwa tegelelwa shi longekidhwe noshimaliwa shi vulithe poomiliona dhi li ndatu.

Oshimaliwa shoka osha li nduno tashi longithwa ok dhana omaudhano ga yooloka, okuyotha onyama nokulya noshowo okuhokolola omaudhigu ngoka ga taalela oombelewa dhawo miitopolwa.
Mbaka oya li ya hokololwa kutya nonando oshilongo osha hokololwa kasha na oshimaliwa onkene ngaa ya li ye na elalakano lyokulongitha oshimaliwa shoka opo ya nyakukwe pamwe.

Oonzo ndhoka dha inekelwa nawa kuKundana odha hokolola kutya sho oshikundaneki ShaNew Era sha ningi omapulaapulo koshiningwanima shoka oshiwike shika amushanga ta kalele muuministeli moka Emma Kankema okwa shanga ontumwafo ofupi kutya oshigongalele shoka shilindi manga sigo oompoka taya ka tseyitha.

Oonzo odho tuu ndhoka odha hokolola kutya ontumwafo ndjoka inayi gandja omantompelo kutya omolwashike shika sha kalekwa manga.
Ihe oya fekele kutya ooshoka mbaka ya dhengelwa koshikundaneki shoka na kasha li muuwanawa woshigwana taya ningi omayinyanyudho omanga ooprojeka ndhoka tadhi yambulapo aanyasha mboka ye li momangeshefelo omashona dha kalekwa oshoka kapu na iimaliwa.
“Opu na woo oombelewa dhimwe hadhi longo kohi yuuministeli mboka wa tumbulwa pombanda hadhi longo kadh ina omeya nolusheno omanga uuministeli wa hala oku uvitha nawa aaniilonga mboka haya longo iilonga mbyoka ya inekelelwa ,” osho onzo ndjoka woo yi li muuministeli moka ya hokolola.

Ashike shoKundana a ningi omakwatathano naAmushanga ta kalelele muuministeli moka, Kenkama, okwa li a pula a tuminwe omapulo koshinima shoka nokwa uvaneke ta yamukula meendelelo shoka ina ninga sigo ongashingeyi.
Ihe ngoka omupititikwatakanithi gwomikuli ndhoka hadhi pewa aagundjuka ndhoka woo nadho dha kalekwa opo uuministeli wu unganeke oku iyuvitha nawa Helen Amukoto okwa hokolola kutya oku iyuvitha nawa kwaaniilonga hoka okwa tulilwa oshimaliwa shawo shi li po na onkene aantu inaya pumbwa okuhokolola sha shi na sha naashoka.

Amukoto okwa hokolola kutya aagundjuka oyo etompelo molwashi omayindilo gawo ga kalekwa oshoka ohaya ende kashona ngele tashi ya pokufuta omikuli dhawo.

“Aagundjuka ohaya ende kashona noonkondo ngele tashi ya pokufuta omikuli dhawo shoka tashi vulu okutula uuministeli pondondo yoku enda kashona opo ya fute omikuli dhaamboka ya tula mo omaindilo,” osho Amukoto a popi ngaaka sho a pulwa kuKundana kutya omolwashike naye a pitika iimaliwa yi longithwe okwiinyanyudha omanga ooprojeka ndhoka dhi li mewiliko lye dha kalekwa.

Kundana okwa li woo a popi na Esegiel Kandetu ngoka e li omuhwahwameki moshikondo shokuhumitha aagundjuka komeho ngoka a hokolola eiyuvo nayi kutya naye okwa limbililwa kutya omolwashike uuministeli wa kaleka manga okufuta omikuli dhaagundjuka.
Kandetu okwa hokolola kutya aagundjuka mbaka oya li taya ka longitha oshimaliwa shika okulanda iilandithomwa yawo ya gwana opo ya ka landithe komaulikilo giipindi ngoka ga li ko miitopolwa yawo ihe ngashingeyi omaulikilo giipindi ngoka oga pita inaaya pewa omikuli dhawo.

LEAVE A REPLY

Please enter your comment!
Please enter your name here