Omukalelipo gwaNamibia a hupitha Aanamibia mokana konkoshi koBenin

0
287

Pinehas Nakaziko

WINDHOEK – Aanaminbia yaali aagundjuka mboka ye li moshikondo shomainyanyudho, ye li aawuliki yiizalomwa oya pupula kombunda omukalelipo gwaNamibia koGhana ngoka a li e ya hupitha moonkugo yi na onkambe okuza koBenin, hoka ya ti oya monena ko iihuna shimwe to nyengwa. Pakkala Ashipala naSaara Shipuata, mboka ayehe ye li aailongi koshiputudhilo shopombanda shaUnam, oya li koCotonou shaBenin ya kuthe ombinga methigathano lyokakadhona dhingi miiputudhilo yopombanda muAfrica. Ashipala, ngoka a yi moonkundathana noshifo oshimwayina naashika shoNew Era sho a galuka, okwa ti pethimbo ya li moCotonou oya li ya lombwelwa kutya kaya li we ye na uuthemba womuntu yo naya igilile onkalo noompango dhomegumbo moka ya li manga ethigathano inaali ningwa.

Sho ya li ya nukile pomutenya oya li nya ningilwa omambandameko kutya otaya shunithwa koNamibia. “Esiku ndyoka olyo wo ya li ya lombwelwa kutya ethigathano itali ka kala ko we mo17 Aguste ngaashi sha li sha uvanekwa, ashike olya li lyu undulilwa komeho lyi ka kale ko mo25 Aguste na inapu gandjwa nando etompelo lyasha,” Ashipala ta ti. Pehala lyomulalo, omakumbatha kaga li ga gwana aakadhona ayehe mboka ya li taya kutha ombinga methigathano noya li ya longitha omapandela gawo gaNamibia onga omakumbatha uule wethimbo alihe ndyoka ya kala moshilongo shika shomuuninginino waAfrica. Omapandela oya li ye ga hehela kUuministeli womakwatathano giikwapondje nelongelokumwe manga ya li inaaya thiga po oshilongo. “Sho nda pula ekumbatha konima yomasiku gane, oya yamukula kutya oga pwa po oshoka anuwa onde ya nda tokelwa, onkene aniwa nandi ninge ondunge oshoka aakiintu yAafrica ohaya ikilile. Otwa li ashike twa pewa ongonga yimwe yombaapila yokwiitheta nonando twa li mo yane mondunda,” Ashipala ta ti ngaaka.

Ta gwedha ko kutya oya li wo ya longitha uuyaha okunwina mo oteye. “Otwa li tatu si ondjala oshoka otwa li twa ningi omasiku gatatu nenge gane twaa na iikulya. Oya li ya uvaneka okukala ye tu sila oshimpwiyu ngele tashi ya kiikulya, ashike oya ka kala po taye tu pula iimaliwa yokulanda iikulya, shoka sha hala okutya ngele inatu ya pa iimaliwa nena itatu pewa iikulya, otwa li woo twa futu omahooli,” Ashipala ta tsikile ko ngaaka. Shi ikwatelela kuShipuata, oya li wo ya hepekwa pambepo, oshoka oya li ya falwa kOudah, omukunda gu li popepi nondoolopa moka ya li ya talele po omahala ngaashi oteempeli yoombome.
“Oya li taya ti otatu yi koshikunino shomayoka, ashike sho twa thiki hoka, oya ti oteempeli yiikalunga yawo notwa li twa pumbwa okugamenwa kiiponga ayihe.

Oya li taye tu tula omayoka mothingo anuwa oku tu gamena ashike yamwe yomutse otwa li twa tindi, shoka sha li she ya geyitha,” Shipuata ta ti, ta gwedha ko kutya oya li ya falwa ishewe komawendo opo ya popye naasi.
“Oya li wo ya hala okukwata ndje ombambyona ashike onda li nda hupithwa kuAshipala, ngoka a kala mekwatathano naakalelipo yetu sigo nukuli ye mu tidha mo megumbo,” Shipuata ta ti ngaaka.

“Omukalelipo gwetu koGhana Charles Josob okwa zi koAccra e te tu ile koCotonou, pamwe naye otwa yi koGhana kombelewa yomukalelipo, hoka oko ihe twa zi twa tuka okuya koNamibia mo31 Aguste,” Ashipala ta ti.
Ethigathano olya li lya totwa po nelalakano lyokunkondopeka aakiintu, okuhwahwameka uukumwe nomapashiyono moAfrica.

LEAVE A REPLY

Please enter your comment!
Please enter your name here