Quado Boy a tseyitha egaluko lye moongalo konima yoomvula ndatu

0
27

Pinehas Nakaziko

WINDHOEK-Omwiimbi gwoongalo dhomaludhi ga yoolokathana, Moses Nasheovanhu Shikalepo ngoka a tseyika moongalo nedhina Quado Boy osho a ulike egaluko lye mehangano lyoongalo, sho a li a pititha oalbuma ye ontiyali oshiwike sha zi ko  yedhina Ethimbo, konima yuule woomvula ndatu.

Quado Boy ngoka a li inaa pititha oalbuma mbala okwa ti ye okwa kala noku ipyakidhila niinakugwanithwa yimle, ashike shika inashi mu ethitha oku imba. Oalbuma ndjika oyi na oongalo 17, ndhoka dhi na omulyo gwoongalo gwa yoolokathana.
Oalbuma ye ontiyali okwe yi luku ethimbo nelalakano kutya okutseyitha kutya nande ethimbo otali endelele, ye oku na ashike okuthika.

“Shika osho sha etitha ndje opo ndi kale nda pititha aolabuma yandje pethimbo ndika, nonando onda kalako,” Qwado Boy ta ti ngaaka.
Moalbuma muka otamu adhika oongalo ndhoka ngaashi ndjoka ya lukilwa oalbuma yedhina Ethimbo, a eyi imba pamwe naExit, Matilla naM-Jay. Otamu adhika ishewe ongalo ndjoka yedhina Ovalumenhu, tayi popi opo aalumentu ya hulithepo omadhipago gaakiintu moshilongo.  
Omu na ishewe ongalo yedhina Tate Sem ta kwathelwa kuMatilla, tayi popi kombinga yokugandja esimaneko kwaashoka Omukokolipresidente a ninga okuza kemanguluko lyoshilongo.

Moalbuma muka otamu adhika ishewe uungalo mboka a li a pititha nale ngaashi Kamoli Kamoli, hoka ka kala noku inyenge nawa mooradio dhOshiwambo. Kamoli okangalo hoka a li e ka pititha opo a gandje omulyo gwoongalo dhe kaayambidhidhi ye shoka ye na okukala ya tegelela moalubuma ye ndjoka ya tegelelwa  yi ka pite mbala.

Ongalo ndjika nokavidio Kamoli otaka popi kombinga yomukadhona ngoka gwedhina Kamoli, a li e li mohole naQuado, ashike shoQuado a kwatwa po kopolisi ee ta yi mondholongo oomvula mbali sho a galuka mo Kamoli ine mu mona.
Okavidio otaka gandja ehokolol nkene Quado ta kongo omuholikekadhona gwe nopehulilo okwe ke mu adha monkalo yi li nayi e na etegelelo kaali shi lye.

Moalbuma otamu adhika ishewe ongalo Kwata Mukweni, ndjoka nayo ya li ye shi enditha nawa omvula ya zi ko.
Quado Boy okwa valelwa moKwanza-sul moAngola, noku li omukalimo gwomoRuacana. Okwa li a mana omatilika ge posikola ndjoka yoRuacana High School mo2008  nokwa li a tameke noongalo dhe mo 2010.
Quado Boy okwa li a pititha oalubuma ye yotango, yedhina Move On mo2014, ndjoka ya li yi na oongalo 12 mwa kwatelwa ndhoka dha tsa ngaashi Oshike, Tate Sem naKwata M’kweni.

LEAVE A REPLY

Please enter your comment!
Please enter your name here