Shiti ota tekele Mbundje ngula mekopi lyaMetropolitan Swabou Summer Cup

0
18

Shipi Elago

Oshakati – Iitopolwa ihetatu ngula otayi ka ninga oshuulilo pokapale koIndependence Stadium mOshakati okutala ngoka ta ka ninga enyakwa muudhano waMetropolitan Summer Cup wokatanga kokoompadhi naahoka komokambamba.

Dibasen Junior Secondary School ita ka wapa we okukondjela ekopi ndyoka a li a sindana omvula ya za ko oshoka ina pondola okusindana uudhano woshitopolwa shErongo ndyoka oshikando shika lyi li lya kalelwa po koKaribib Junior Secondary School mokatanga kokoompadhi omanga Atlantic Junior Secondary School a kalela po Erongo mokatanga komokambamba.

Ndiyona Combined School ngoka e li enyakwa lyo 2017 oku li a galuka a kondjele ekopi lye mokatanga komokambamba nota ka enda pamwe naNyangana Combined School ngoka ta ka tala ngele genongo otaga ka fa tuu gongombe muudhano wokatanga kokoompadhi.
Oshana osha kalelwa po kOkau Combined School mokatanga kokoompadhi omanga mokatanga komokambamba ta shi kalelwa po kOshekasheka Combined School.

Omusati ogwa kalelwa po kuJohn Shekundja mokatanga kokoompadhi omanga Oshaaluwata Combined tashi ke etelela osipana yokatanga komokambamba.
Adam Steve Combined School oye ta ka kalela po Karas mokatanga kokoompadhi, omanga Lordsiville JSS ta ke ya kalela po mokatanga komokambamba.
Onyuulaye Combined School oyo tayi ka kalela po Oshikoto mokatanga kokoompadhi omanga Ondjamba JS tayi ka kutha ombinga mokatanga komokambamba.
Ohangwena oya kalelwa po ku Immanuel Uahengo Combined School mokatanga kokoompadhi, nomokatanga komokambamba oya kalelwa po kEhafo Combined School.

Oshitopolwa shaHardap osha tegelela Daweb JSS e ke ya kuthe kohulo yegonga mokatanga kokoompadhi, naDaniel Joubert Combined School e ke ya mangulule mokatanga komokambamba.

Omusindani gwuudhano mbuka gwokatanga kokoompadhi nokatanga komokambamba ota ka fadhuka po nokapandi kooN$15 000, ekopi, oombandi dhoshingoli, niizalomwa yetanga.

Omutiyali ota ka mbendekwa okapandi kooN$9000, oombandi dhoshisiliveli osho wo iizalomwa yetanga.
Omutitatu ota ka pewa okapandi kooN$6000, oombandi dhoshikushu, niizalomwa yetanga, omanga omutine ta ka hekelekwa nokashona kooN$ 4000, niizalomwa yetanga.

Ehala etitano sigo etihetatu kehe osipana otayi ka mbendekwa iizalomwa yetanga.
Ekopi ndika oha li dhanwa owala kooPrimasikola dhomiitopolwa ihetatu moshilongo; Oshana,Ohangwena,Omusati,Erongo,Hardap kavango East, Oshikoto na//Karas naashika otashi ka ninga oshikando oshi-11 uudhano mbuka tawu dhanwa konima sho wa li wa totelwe po momumvo 2007.

Metropolitan Swabou oku li a tula po okapandi kooN$450 000 okukwashilipaleka uudhano mbuka hawu tamekele okudhnwa kuutayigona wiikandjolongo tawu tsikile wa thinda komathigathano giikandjolongo nosikola ndjoka ya sindana po omathigathano giikandjolongo moshitopolwa kehe oyo hayi kalele po oshitopolwa shayo muudhano wahugunina mboka wa tegelela wu ka fumvike onkolo ongula yanakwasha mOshakati.

LEAVE A REPLY

Please enter your comment!
Please enter your name here