Aapangi yaali ya kuthwa miilonga molwa uuhasha

0
317

WINDHOEK – Aapangi yaali pokakilinika kaKuryangava mboka aniwa ya tindi okukwathela ominamimvo 24 mokupulumutha, nokwa ka monena okanona posheelo shokapangelo, oya kuthwa miilonga pakathimbo mbala manga taku landulwa omilandu. Ominista yUuhaku Bernard Haufiku okwa li a popi mopaliamende mEtiyali kutya uuministeli owa li wa ningi omakonaakono moshiningwanima shika sha holoka momasiku 31 Aguste naashika kutya aapangi mbaka yaali otaya ka patululilwa iipotha yin a sha neyiuhumbato nayi nuuhasha. Haufiku ta ti otashi vulika ya ka tidhwe miilonga.

“Ngeno onda li ndi na oonkondo ngeno otandi ya tidha miilonga ngashiingeyi,” Haufiku ta lombwele aanapaliamende. Okavidio komukulukadhi ta mono okanona oka li ke li komalungula.

Haufiku okwa ti okwatsakanena nomukulukadhi, okanona ke hoka opo ka valwa, osho wo omukulukadhi omukwawo ngoka a li e mu thindikila kokakilinika mo31 Aguste. Miipathi yaapangi mbaka yaali, Omukuluntu gwuundjolowele moKhomas, Omunambelewa gwokugandja omayakulo osho wo aanambelewa yalwe pokakilinika kaKuryangava, Haufiku okwa li a pula omukulukadhi a hokolole oshiningwanima nkene sha enda. Okwa pula wo epitikilo lyomukulukadhi a thanekwe osho wo ewei lye lyi kwatithwe.

Omukulukadhi okwa popi kutya okwa dhimbulula kutya okwa li e li pokumona lwopotundi 07 yongula mEtitano ndyoka lyomasiku 31 nokwa dhengele kahewa ke gumwe e mu thindikile. Oya li ya londo motaksi.

Sho ya thiki pokakilinika lwopotundi 08h45, oya li ya lombwele aapangi mboka yaali kutya oye li pokumona nokwa li e uvite kutya okanona oke li pokuvalwa. Pehala lyoku mu konaakona, oye mu pula kutya okwa kala ha yi komathulo, moka a li a yamukula kutya okoshipangelo shoWindhoek Central Hospital.

Na inaa ye mu konaakona, aapangi mbaka oya li ya lombwele omukulukadhi nguka a ye koshipangelo shepangelo shaCentral oshoka kaya li ye na iikwa niipangitho pokapangelo. Omukulukadhi okwa li a monene okanona posheelo shoshipangelo manga ta thanekwa kaantu mboka ya li ya kumwa. Okanonona oka li ka tindila mombulukweya ye sho aapangi mbangka ye ya oku mu kwathela.
Ehokololo lyaapangi mbaka yaali tango olya li lya popi kutya oya li yu uvu onkugo yomukulukadhi ta pulumutha noya li ya endelele oku ke mu kwathela ngoka konima a li a tuminwa koshipangelo shaKatutura, noya li nawa ayehe nokamona.

Ashike ehokololo lyawo kalya li tali tsu kumwe naandyoka lyomukulukadhi osho wo shoka sha monika komunambelewa gwokugandja omayakulo muuministeli wuundjolowele, Manga Libita. MOmaandaha, mbaka yaali oya li yi itaala kutya kaya li ya tula omukulukadhi monkalo yokukala a manguluka, no kaya li ye mu konaakona nando.

“Gumwe gwomaapangi okwa li a popi kutya osha li oshikando shotango a mona omumvu kee na omandhindhiliko guuwehame womuntu e li pokumona okanona koshipala,” Haufiku ta ti.

Konima yoshigongi mOmaandaha pokakilinika pOkuryangava, aapangi oya li ya indile ya dhiminwe po kuminista, osho a li a lombwelwe aanapaliamende yakwawo mEtiyali.

“Onde ya lombwele kutya kandi ya tonde ashike omolwamakwatathano gawo nomuvu…Omaihumbato gawo itaga dhimbiwa oshoka inaya ninga omumvu a kale a manguluka,” ta ti ngaaka.

Ta popi wo kombinga yiipotha yomayihumbato nayi mokati kaaniilonga yuuhaku, ta ti ope na oshipotha shi li kOpuwo hoka omuvu a sile momukweyo gwoshipangelo.

“Ohatu adhaiipotha mbika mpano naampeyaka. Otu shi kutya ope na omaudhigu ashike ongaagandji yuuhaku otwa gana. Otu na okwiiyutha koompango dhoshipangelo onga aagandji yuuhaku,” Haufiku ta ti.
Aapangi mbaka yaali ya kuthwa miilonga pakathimbo oye na ontseyo yoomvula 26 osho wo 14.

LEAVE A REPLY

Please enter your comment!
Please enter your name here