Efiyafano loudano woChess lotete kovanafikola ola enda nawa moLüderitz

0
21

Tuulikki Abraham

Lüderitz – Ongulumambo yopashiwana moLüderitz melongelokumwe nomuliyambi a dja koAmerica, Spencer Gardner, ova li va unganeka efiyafano loudano woChess kovanafikola modoolopa yaLüderitz, efiyafano ola li ko Olomakaya olo twa dja, mongulumambo yopashiwana moLüderitz (Library).

Umwepo womovaunganeki Beverley Van Wyk omukwateli komesho womongulumabo mo üderitz okwa tumbula kutya efiyafano ola enda lela nawa, ta ti efiyafano ola li la yeulukila ovanafikola aveshe modoolopa navahapu ova li va kufa ombinga.
Ovanafikola ava va kufa ombinga, keshe umwe okwa li a mona omhito yokudana oikando i li ivali, opo ku talike kutya omufindani oye lye.

Mefiyafano lotete, John Krohne, Rodriquez Visser naPaulus Mnywambele ovo va findana. Mefiyafano laxuuninwa ola li pokati kaPaulus Mnywambele naJohn Krohne omo Mnywambele a yauka mo nepapa a findana e shi a denga mo Krohne.

Van Wyk okwa pandula unene ovanafikola aveshe ovo va li va kufa ombinga, oshoyo ovanageshefa modoolopa ovo ve va yambidida opo efiyafano eli li dule okuningwa. Ovanangeshefa ovo va vatela ongaashi ofitola yaOK moLüderitz noHarmony Dealers yomo Lüderitz.
Van Wyk ota tu omukumo ovanafikola modoolpa opo va kufe ombinga momadeulo oudano woChess, oo hau kala mongulumambo Etivali nEtine keshe moshivike konima yofikola. Omadeulo okwa yeulukila ovanafikola aveshe, ovo ve na nale eshiivo loChess, naavo vehe na eshiivo ndele ove na ehalo lokulihonga oudano woChess.

Omadeulo ohaa yandjwa oshali komuliyambi Omuamerica Spencer Gardener.

LEAVE A REPLY

Please enter your comment!
Please enter your name here