Namibia na opaleke omapuko gevi

0
17

Omutumba omutiyali gu na na sha neyandjakaneko lyomavi nomatulululo gopashigwana otagu ka kala ko moshiwike shotango shaKotomba nuumvo.

Omasiku ngaka otwa mono nkene aakwashigwana oyendji ya gandja omayiuvo gawo kombinga yankene ya hala omutumba ngoka gu ete po omalunduluko kombinga yomavi moshilongo.

Omolwuukuloni mboka Namibia a li muwo – tango kuNdowishi ta landulwa kuSouth Africa – Aanamibia oyendji oya li ya kuthwa omavi gawo kaakolonyeki.

Omavi omawanawa ngoka ga li ge na omahupilo guunamapya nuuniimuna oga li ga yekwa Aanambia koonkondo, olwindji komulungu gwondjembo.
Muumbugantu woshilongo, moka monena mu na oofalama oombwanawa, Aanamibia yamwe oya li ya dhipagwa, ya kwatwa koonkondo niimuna yawo oya li ya kuthwa ko koonkondo.

Kakele komavi guunamapya nuuniimuna, osha kala wo oshidhigu kaaluudhe ya mone omavi moondoolopa.
Aaniilonga aaluudhe oya li ya tegelelwa ya shune komikunda dhawo ngele omukakena gwiilonga (okontraka) yawo gwe ya pehulilo.
Aaluudhe kakwa li ya pitikwa ya kale moondoolopa ngele kaye na iilonga. Pethimbo lyokaholo, aaluudhe mboka ye ethelwa kuushimba oyo mboka owala ya monenwa iilonga nale.

Sho ya thiki muushimba, aaniilonga mbaka oya tulwa mookomboni, moka ya kala sigo ookotranka yiilonga yawo ye ya pehulilo.
Pethimbo mpoka, aatiligane osho wo aakolonyeki oya kala tayi ikuthile omavi omawanawa ya tunge po omagumbo gawo.
Otaku dhimbulukwa nkene momumvo 1959 aaluudhe mOvenduka molukanda halu ithanwa Old Location (monena hashi ithanwa Hochland Park) ya li ya lombwelwa ya thige po ehala ndyoka, ya yapukile aatiligane.

Aaluudhe oya li ya thiminikwa ya ye koKatutura, hoka pethimbo mpoka sha li ashike olukanda lwontsi nomamanya.
Etidho lyaantu ndika olya etitha omaipumomumwe moka mwa sile Kakurukaze Mungunda ngoka a li a yahwa nondjembo kopolisi yokatongotongo yaSouth Africa.

Oshiningwanima shika osho sha kutha Omukokolipresidente Sam Nujoma naagundjuka ooyakwawo moshilongo sho ya ka konga omakwatho kiilongo yopondje opo Namibia lyi manguluke.

Shika otashi ulike kutya ekondjo lyemanguluko lyaNamibia olyali unene lyi na sha nevi.
Ngele ekondjelomanguluko olya li lyi na sha nevi, omolwashike sigo onena – oomvula 28 konima sho oshilongo sha manguluka – Aanamibia oyendji natango kaye na evi?

Omolwashike sigo onena evi lyi li momake gaatiligane mboka ooyinakulu yali ya kutha ko evi koonkondo?
Omutumba omutiyali gu na na sha neyandjaganeko lyomavi nomatulululo gwopashigwana ogwo ompito onene aaleli yetu yopapangelo naamboka yopamuthigululwakalo ye na ya opaleke uufuthi waakolonyeki.

Nonando ongaaka, otatu kunkilile aaleli yetu ya kwate nawa oshikumungu shevi oshoka ngele shika inashi ningwa, oshilongo otashi vulika shi ye monkalo yiita ngele omihoko dhimwe odhi wete inadhi yalulwa nawa ngele tashi ya komatopolo gomavi.
Oshinima oshikwawo shi na okutalwa nawa oshi na sha nomavi gomondoolopa ngoka ge li ga pumba noge na ondilo, unene kaagundjuka mboka ya hala okutota omagumbo gawo.

Gwonale okwa tile omukuluntu etungwa lya siikilila ombepo. Einekelo lyetu olyi li nee mpano kutya aaleli yetu ayehe otaya ka katuka oonkatu kamana opo ya opaleke omapuko guukoloni ge na sha nomavi moshilongo.

LEAVE A REPLY

Please enter your comment!
Please enter your name here