Omufekelwa mokupititha iingangamithi a pewa obooloha

0
78

Nuusita Ashipala

ONGWEDIVA – Omunambelewa kOndholongo yaLuno ngoka a li a holoka mompangu sho a li anuwa a yakele mondholongo iingangamithi oshiwike sha zi ko okwa li a pewa obooloha yooN$4000 mompangu yamangestalata mOndangwa. Oshipotha osha undulilwa komasiku 22 gaNovemba manga taku ningwa omakonaakono ga gwedhwa po.

Martha Nanyemba, omunamimvo 34 okwa taalela oshipotha shokukala e na iingangamithi niinima yilwe konima sho a li a adhika e na oongodhi dhopeke dhi li ne, oopela 19 dhomandrax dhongushu yooN$2 850 noogalama 210 dhepangwe dhongushu yooN$2 100, uusamekithi womakaya, uupalwa nuukalata uyali womongodhi. Iinima mbika oya li ya adhika mokandjato ke kopeke. Nanyembwa okwa li a mangwa po pethimbo a li ti ilopota miilonga. Okwa li a kwatwa konima sho omukwashigwana gwontumba a li a nothele ko opolisi,ndjoka ya li ye mu tegele omwigo.

Konima sho a li a pewa obooloha, Omupevikuluntu gwondholongo ndjika, Veikko Armas okwa ti Nanyemba ota ka tulwa koshikondo shi ili hoka itaka kala e na ekwatathano naanandholongo.

Armas ta popi kutya ondholongo ngashingeyi otayi ningi omakonaakono gawo gomeni ngoka taga ka gandja kutya onkatu yini tayi ka katukilwa Nanyemba.

“Mopaife, otwi ipyakidhila nomakonaakono gomeni. Ngele gapu otatu ka gandja omulombo kutya oshike tashi ka ningwa po,” Armas ta ti.
Shi ikwatelela kuArmas momupopyo a li e gu ningi nale, okwa ti Nanyemba otaku lopotwa e na mboka haye mu etele iinima mbyoka ha ka gandja kaanandholongo.
Otaku popiwa aniwa a li ha futwa.

Taku fekelwa aniwa a mono oshimaliwa shi li pokati kooN$250 noN$400.
Pethimbo ndyoka omupevikuluntu nguka okwa li a gunu aanambelewa yondholongo yi iyageke mokukutha ombinga miilonga yaa li paveta.

LEAVE A REPLY

Please enter your comment!
Please enter your name here