Oshipotha shomulumentu ngoka a li a dhipaga omukulukadhi gwe sha undulilwa komeho

0
122

Victoria Kaapanda

OSHAKATI-Oshipotha shaMathias Shindinge Kalunga ngoka e li ta fekelelwa omadhipago gaali gomukulukadhi gwe Selma Imbili, naMatheus Yuye, osha li sha undulilwa komasiku ga02 Kotomba nuumvo mompangu yopombanda yaShakati.

Kalunga (48) ota tamenekelwa edhipago lyomukulukadhi gwe Imbili (30) oshowo Yuye (39) ngoka taku hokololwa kutya okwa kala e li mekwatathano lyopahole naImbili, nokwa li e ya dhipaga nondjembo yombistoli yo9mm.
Oshiningwanima shono osha li sha ningwa uusiku wokupendukila esiku lyohole, ano 14th Febuluali 2013, mOmafo moshitopolwa shaHangwena.

Kalunga ngoka a li a holoka mompangu nomukumo gokutokolelwa egeelo lye, inashi vula okutsikila ngaashi sha li shi na okukala pawiliko lyamangestalata Herman January. January okwa li a lombwele ompangu kutya ita vulu okutsikila noshipotha oshoka ke uvite nawa, nota yi mokafudho okafupi.

Otaku hokololwa kutya Kalunga okwa li ha longo koWalvis Bay momeya, nokwa li a dhengelwa ongodhi kuHilya Haifene kutya omukulukadhi gwe oku li mekwatathano lyopaihole naYuye ngoka a li omunangeshefa gomoAngola.
Iimbili, yina yuunonano utano ngoka a li ha longo mosalona mOshikango okwa li a hulitha sho kwa li a yahwa iikando ihamano omanga Yuye a li a yahwa iikando iyali.

Kalunga okala noku ipopila kutya elalakano lye kalya li lyokudhipaga ihe olya li lyokukwashilipaleka kutya sho a li a lombwelwa kuHaifene oshoshili, okwa li wo a pulwa kutya omolwashike e na okukala a humbata ombisitoli yi na ooholo dhi li hetatu.
Okwa li a yamukula kutya ondjembo ye ke yi thigapo nkene a kala oha kala e yi homata ethimbo kehe. Okwa li a popi kutya elalakano kalya li lyokuyaha, ashike ohauto ndjono ya li tayi hingwa komuholike gwa Imbili okwa li tayi hingwa ya uka muye nokwa li a tokola e ya umbe nondjembo.

Oombangi ndhoka dha li poshiningwanima sho tashi ningwa odha li dha lombwele ompangu esiku lyiihokolola kutya oya li ya uvu etopo lyondjembo ominute ngiika ntano lwaampoka omanga ohauto inayi thika pegumbo.

Nokonima ohauto okwa li tayi hingwa ya uka kombinga yomayendo ee tayi thikama kooha dhondhalate yomayendo.
Taya hokolola kutya ohauto sho ya li ya thikama, oya mono omulumentu a zi momilema ee ta ondamene mohauto neendelelo ee ta kana po natango u uka momilema mu a zile.

Paulus, ngoka oye gumwe gwomoombangi okwa li a hokolola esiku ndyoka kutya sho a thiki pohauto okwa adha Yuye a lala a taalela koshipundi shomufalelwa mohauto, nokonima sho aakwashigwana ya gongala poshiningwanima, olutu lwa Imbili olwa li lwa adhika mpoka pwa li pwa tamekele etopo lyoondjembo.

Ehokololo lya kalunga kakwa li tali tsu kumwe naandyoka lyoombangi oshoka okwa li a popi kutya sigo ohauto tayi thikama mondhalate yomayendo inatopitha ondjembo yasha.

Osha li sha etwa puuyelele kutya Kalunga okwa li a kuthwa ondjembo kopolisi mo2008 sho a li a ningile omukulukadhi gwe omatilitho. Ta popi kutya omukulukadhi gwe oshipotha okwali ashike e shi patululamolwaashoka okwa li e mutindila okushuna konooli nokwa li a shunithilwa ondjembo ye, ihe okwa li a londodhwa kaa ningile we omukulukadhi gwe omatilitho.

LEAVE A REPLY

Please enter your comment!
Please enter your name here