Shox te shi enditha nawa moongalo dhe

0
173

Pinehas Nakaziko

Windhoek-Natangwe Neingo, a tseyika nedhina Shox oku li te shi enditha nawa ngele tashi ya moongalo dhe.
Shika oshalandula sho ali apititha oalbuma ye ompe yedhina Okapale, moka muna ashike oongalo ndatu ngaashi Okapale, Respect Woman naMonapo.

Oongalo dhika adhihe odhili tadhi inyenge nawa unene tuu komapandja gwoIntaneta oshowo kooradio dhimwepo dhomoshiloongo.
Shox moalbuma muka okuli alonga naahikingalo okuziililila komahangano gwoongalo gayoolokathana ngaashi Nox-Mabane okuza koCamouflage Namibia,  Voster Wamee okuziilila koUGU,  Kledo Lava Duro, D-Fresh naMorocky  mboka yaza kehangano lyoNacaZa Ent.

Shox ngoka eli akokela nokwa kala haningile oongalo dhe moTsandi mUukwaluudhi okwa kala eshiwikile kongundu hoka akala ha imbile pamwe nayo, uule wethimbo yedhina Rough Squad. Ongundu ndjika okwa topoka nayo  opo atameke oku imba oye awike.

Shox okwati etepoko lyawo pokati kaahikingalo mboka haya imbi pamwe kwali omolwa ashike ethimbo ndyoka ihaaya mono, unene oku kala pamwe nokushanga omaimbilo gawo pamwe. Shox ngoka eli omundaanisi, nomushangi gwoongalo, okuli ishewe omunasikola, ta ilongo koshiputudhilo shopombanda shoIUM.

Ngashingeyi Shox keli nande ashainwa kehangano lyasha, ye okwati okwa hala oku imba manga oye awike, ye atule oongalo dhomoshilongo pamuthika gwopombanda.

Okupotsa kombinga yongundu ye ndjoka akala ha imbile, Shox okwati oyali ashike ya tameke manga onga ongundu yokundaanisa, manga yali inaaya tameka oku ninga oongalo dhomulyo gwoKwaito, noyali ya pititha ongalo yawo yedhina Yi Repeater, yaningwa omikwelengendjo ku King Elegant.

Mo2015 oyali ya pititha oalbuma yawo yotango, noya kala okathimbo yamwenapo, mpoka ongundu yatameke tayi halakana.
“Tse naa imbi yongundu yo Rough Squad ina tu ininga nayi, notuli natango ookume aanene,” Shox tati ngaaka.
Okwati nuumvo ota tsikile noku tula oongalo dhe pamuthika gwopombanda, nota ka imba pamwe naahikingalo aanene mehangano lyoongalo lyaNamibia.

LEAVE A REPLY

Please enter your comment!
Please enter your name here