Aahungi yombenzi ya yi kombaanga neimemeho

0
769

Victoria Kaapanda

OSHAKATI – Ethigathano lyoombenzi, lya li poLG mOshakati mehuliloshiwike lya zi ko olya li lya hanganitha aasamane yoombezi koonono moshilongo.

Aalumentu ye li 15 oya li kutha ombinga methigathano lyoombenzi, moka mwa li mwa tothwa Petrus Shimweefeleni oye e shi pondola mokangundu koombezi oondeendeka, George Shivute naye okwa li e shi pondola mokangundu koombenzi dha thita nawa oshowo Jona Daniel ngoka a li e shi pondola mokangundu koombenzi dha kululwa nawa.

Aalumentu mboka yatatu oya li ya gwanitha ashihe shoka sha li sha pumbiwa nkene oombenzi dhi na okumonika opo gumwe a kale a sindana ooN$5000 kehe mokangundu.

Moonkundathana nonzonkundaneki ndjika Shimweefeleni, 63, a yambukile komukunda Ondobe, okwa ti oku uvite ombili nuuntsa sho a sindana iimaliwa mbyoka.

Ta ti oku na uunona wu li koosikola oshowo kiiputidhilo, nota vulu oku wu tumina okashona okuza miimaliwa mbyoka a sindana, oshowo okumbaanga okashona hoka ta hupu po nako.

“Oomvula ine shuuka kuntano nda kala noombezi ndhika, nonda kala noku dhi sila oshimpwiyu nomagadhi goontanga, ashike ote tsikile oku dhi sila oshimpwiyu opo omvula tayi ya sho tandi ya ndi kuthe ompito methigathano ndino odha pitilila pwaadhika ndi na nena”. Shimwetheleni ta ti ngaaka.

Ethigathano olya li lya yambidhidhwa komahangano ngaashi, Namibia Breweries, Distell, Remind Trading CC, LLJ trading, Oshakati Cold Storage, Meatco, Oshikuku Pit Shop, Shetweeni Trading, Onyofi Trading, Oshipuku Trading oshowo Metro.
Omukwatelikomeho nomulongekidhi gwethigathano lyoombenzi Remind Ekandjo sho a li a kuthileko iikundaneki oshiwike sha zi ko okwa popi ta ti elalakano lyoku ya po nethigathano ndyoka okuyambulapo nokusimaneka oombenzi mokati kaalumentu.
“Omulumentu oha simanekwa unene ngele e na oombenzi.

Ombenzi oshinima sha kala ko nale oomvula dhonale, nongashingeyi otwe shi talako onge omuthigululwakalo ngoka gwa kala gwa simanekwa kootate yonale notwa hala okukalekapo omuthigulwakalo ngoka ogo omulilo gwoshilongo,” Ekandjo ta ti.

LEAVE A REPLY

Please enter your comment!
Please enter your name here