Ekonaakono lyondondo 10 lya eta ko omayulu… oondingosho ndhoka tadhi ka ninga omakudhilo otadhi ki iyadha momeya omapyu

0
75
WINDHOEK, 10 October 2012- Glasses of alcohol and beer and some empty alcohol bottles pictured when members of the Katutura Police station visited several informal drinking hotspots in their jurisdiction, informing operators about the measures to curb illegal shebeen operations. (Photo by: Francois Lottering) NAMPA

WINDHOEK- Ekonaakono lyondondo 10 sho lya eta ko omayulu, omiya dhaShinana odha gandja elondodho nokutakela omunwe ooyene yoondingosho ndhoka dhi li momalukanda opo ya iyageke okukudhila noongalo dhawo dhomuule. Opolisi tayi gunu wo natango ooyene yoondingosho yi iyuthe koowili dhokupatulula nokupata ngaashi shi li poolisensa dhawo, nenge ngele hasho otaya ki iyadha muudhigu wu vule oonkondo dhawo.

Pethimbo a li moonkundathana noshifo oshimwayina naashika shoNew Era, Inspekta omukuluntu gwopolisi Kauna Shikwambi okwa li a gunu kutya: “Onga oshilongo, otwa pumbwa oku peni aanona yetu ompito oompito oombwanawa dhokwiilonga. Aakwashigwana ayehe otaya tseyithilwa kutya opolisi otayi ka katukila kehe tuu ngoka ta ka lopotwa ta ningi eyogelelo nenge a adhika te ende oveta pomunkulo.”

Ta ti oshigwana otashi indilwa shi lopote mboka taya fekele taya kayula onyanga moshinima shika kosasiona yopolisi ndjoka yi li popepi nayo nenge ya dhengele konomola yopolisi, 10111. Ta tsu kumwe naandhika, Amushanga ta kalelele mUuministeli wElongo, Uunkulungu nOmithigululwakalo Sanet Steenkamp okwa pula opo Aanamibia ayehe ya pe aalongwa ayehe yondondo 10 yi itule mo nokukwashilipaleka kutya ethimbo otali longithwa pamukalo gu uka. Ta tsu omuthindo kutya okukwata konawa kwethimbo oshinima sha simana kaanasikola ngele tashi ya pethimbo lyomakonaakono, ngoka taga ka tameka oshiwike tashi ya sigo okehulilo lyaKotomba.
“Otwa pumbwa omikalo dhokwiilonga dhaanasikola dhi li mondjila. Otwa pumbwa ombili nomahala ga mwena nawa, unene okukwashilipaleka kutya aanona itaya ndumbilwa iilonga yomomagumbo nayilwe mbyoka inaayi simana unene.”

Ta ti, onga uuministeli, otaya pula aanangeshefa, unene tuu ooyene yoondingosho ya kuthe ko oshinima shika neyitulemo yo ya tule omawi gomalyukulyuku gawo pevi.
Steenkamp ta ti itashi shongolitha nando ongeshefa okutula omawi gomalyukulyuku gawo pevi opo aanasikola yi ilonge mombili sigo opehulilo lyaKotomba.

“Naya kwashilipaleke kutya itaya pitika aalongwa ya lande iikolitha, noshitiyali, naya simaneke ethimbo lyokupatulula nokupata ngaashi oveta ye li tula po. Inatu hala okugaluka ngula tatu gandja uusama nando okomuntu ashike otaku kwashilipalekwa kutya ope na esiloshimpwiyu poonkatu adhihe kukehe omuntu e na mo sha melongo,” ta popi ngaaaka. Ta kumike aalongwa yi ilonge ya mana mo opo ya ka ninge shoka ya hinda monakuyiwa.

Steenkamp ta ti wo oosikola adhihe odha mana omayishangitho gaalongwa mboka taya shanga ekonaaakono lyondondo 10. Sho a pulwa kutya omwaalu gwaalongwa mboka yi ishangitha ogu thike peni ngashingeyi, Steenkamp okwa popi kutya uuyelele mbuka, osho wo wulwe mwa kwatelwa okutala kwekonaakono naampoka tapu shangelwa, otawu ka gandjwa moshigwana kOminista yElongo, Uunkulungu nOmithigululwakalo Katrina Hanse Himarwa muule wethimbo efupi twa taalela.

LEAVE A REPLY

Please enter your comment!
Please enter your name here