A hepekwa nokudhipagwa kuuyamba we

0
2421

Komutoolinkundana

WINDHOEK – Omundohotola a li a tseyika nawa mOshakati gwedhina Livingstone Mugimu anuwa okwa nyenyepekwa nokudhipagwa keliko lye.
Oshifo shokoshilongo shoka a zile osha hokolola Mugimu a li a galukile kaandjawo a kanitha mombili nokwa li wo a kanitha einekelo moombanga dhomoshilongo she. Oomwedhi adhihe 11 ndhoka a kala moUganga sho a galuka koNamibia, Mugimu anuwa okwa kala a tula iimaliwa ye megumbo lye, anuwa ihaa mbaanga we, nolwindji okwa kala ta ende niimaliwa ye shaampoka ta yi.

Omwedhi nguka, Mugimu ngoka a kala omimvo odhindji ta longele moNamibia okwa li a galukile koUganda nomaliko ge ogendji nokwa li a adhika megumbo lye lyi li koKikajjo moMakindye Ssabagabo, woshitopolwa shaWakiso, a sa.
Omupopiliko gwopolisi yaKampala Metropolitan Luke Owoyesigyire, okwa ti Mugimu otaku fekelwa a si sho a li uuzigo.

Okukalamwenyo kwomunamimvo 56 nguka okwe ya pehulilo, kwa tetekele iinima oyindji ya nika omupya ngoka gwa kala gwa lambala omaliko ge ngoka a likola kondje yaUganda, ano e ga likola koNamibia.

Manga owala a li e li popepi nokutula po iilongitho mOshakati,, epangelo lyaNamibia, olye mu kutha oshimaliwa shi thike poomiliona N$22m (sh5.8b) shoka sha li kombaanga yaBank Windhoek molwaashoka a kala iha futu iigandjwa yepangelo yi igwana po.
Okwa kambadhala andola oshinima shoka e shi lwithe mompangu yopombanda, ashike ine shi pondola.

Epangelo lyaNamibian olya ti uule womimvo ndhoka Mugimu a kala ta longo onga ndohotola gwokutanda moNamibia, okwa kala ha popi iifundja kutya oha ningi ashike okamaliwa okashona, shoka sha eta opo a kale ta kengelele epangelo ngele ta futu oompale. Epangelo tali ti Mungimu oku na oongunga dhi li poomiliona N$17.7m (sh4.7b) ndhoka e na okufuta oompale, moomiliona ishewe dha gwedhwa ko dhi li N$17.7m (sh4.7b) onga egeelo lyokwaa futa, niihohela yi thike poomiliona N$2.5m (sh667m), shoka sha eta iimalikwa ayihe mbyoka Mugimu e na okufuta poomiliona N$37.9m (sh10.1b).

Sho a mono kutya oonkambadhala dhe andola okumona ko iimaliwa ye kepangelo lyaNamibia dha ponyo, Mungimu okwa pakele iinima ye e ta shuna kevi lyooyina hoka a ka sila. Ashike sho lyuuvu eso lyaMugimu, epangelo lyaNamibia anuwa olya tumu omahekeleko nokupula opo li
tuminwe onzapo yeso lyaMugimu.

Omukuluntu gwoInterpol moUganda, Fred Iga, okwa ti epangelo lyaNamibian okwa uvaneke okugamena omaliko gaMugimu ngoka a thiga koNamibia, ngoka ga kwatela mo egumbo, okakilinika nopoloyeka yoondjuhwa.

ONDJILA ye yokushuna kUganda Mugimu okwa zi ko koNamibia namumwayina Gordon Sengoye, aahingi yaali taya hingi iiyenditho ye itatu mbyoka ya kwatela ooToyota Land Cruiser mbali noFortuna, ya pitila moZambia noku ya moUganda. Ashike manga inaa thika, okwa li a kwatwa kaapolisi yokoshitayi shOpolisi yopaigwana moUganda, a kwatelwa poongamba dhaMutukula momasiku ga6 gaKotomba, 2017.
Otaku hokololwa Mugimu a kanitha oshimaliwa shi thike poomiliona sh300, moshinyangadhalwa shika shiikengelela sha ningwa sho opolisi yalombwelwa iifundja kaakwanezimo yaMugimu.

Mugimu okwa li a mangwa po, e ta ningilwa omatilitho kutya ota patululilwa oshipotha shonkambadhala yokukwathela uukulo moUganda. Iiyenditho ye ayihe itatu okwa li e i kuthwa. Oshipotha shika konima osha li sha dhimbululwa kutya oshiikengelela. Aapolisi yaali Edison Bukholi naChris Musana, oya li ya kwatwa po omanga Director gwopevi gwoInterpol yaUganda Elly Womanya, a li a kuthwa miilonga pakathimbo.

Ashike, Bukholi okwa li a shunwa miilonga a kwatele komeho oshikondo shomakonaakono gopolisi koWakiso.
MUGIMU OKWI IDHIPAGA TUU SHILI?

Mugimu otaku hokololwa i ikutha omweyo gwe yemwene. Owoyesigyire okwa ti Mugimu okwa thiga po okambapila moka a nyola kutya oku uvite uudhigu omolwa omaliko ge ngoka a kuthwa kaapolisi. Ta ti okayaha ke na uuzigo oka li ka adhika mondunda ye yokulala. Ashike yamwe yomaakwanezimo yaMugimu inaya zimina ehokololo kutya Mugimu oye shili i ikutha omwenyo.

MUGIMU OKWA KENGELELWA KOFAMILI

Omutekulu gwaMugimu Bruce Katumba,ngoka a li ha kala megumbo lye ota ti hekulu okwa li a kengelelwa kaakwanezimo lye. Ta ti otashi vulika onkatu ndjoka ya kuthwa kaakwanezimo okulundila Mugimu kopolisi ye mu etele ethindakano lyomadhilaadhilo.
“Tatekulu okwa li ta hala oku ya oonkwengu. Sho onkalo ndjika ya thindi kuuwinayi okwa tameke ihaa vulu we okukotha omanga ini iwenda nowenda yuuwehame yoPethidine hydrochloride nankwawo yoketamine.

“Okwa tameke a pikwa kiingangamithi mbyoka naashika osha e ta opo ndi mu fale koshipangelo koButabika Hospital opo andola a pangwe, kaa kale we a pikwa komiti ndhoka. Onda li nde mu tula mondunda moka a li e na omusilishimpwiyu gwopaumwene opo andola kaa kale we ta mono aatalelipo, ethimbo ndyoka e li kepango. Ashike gumwe gwomaakadhona ye Patience okwa yakele mo ongodhi, nanakusa okwa tameke ishewe oku ya mekwatathano naapambele ye. Omukadhi-nale ngoka oye wo yina yaanona (yaMugimu) yaali Gorreti Asiimwe, anuwa okwa kwathele Mugimu opo i iyake moshipangelo. Okwa nuka ohofa uusiku, ashike sho a nukile pohi okwa teka okugulu. Okwa li a falwa koshipangelo shaMulago Hospital,” Nakyondwa ta ti.

ESIKU A SI
Esiku ndyoka lyiihuna, opolisi oya li ya lombwelwa kutya Mugimu okwa li a tumu Haani, ngoka a li a kutwa opo a kale te mu sile oshimpwiyu anuwa e ke mu landle omiti niilongitho yomoshikunino. Ashike Haani anuwa okwa galuka ko ashike niilongitho, ina etelela omiti, shoka sha geyitha Mugimu noonkondo ndee ta lefa opo a ka lande omiti ye mwene. Sho a galuka okwa yi mondunda ye yokulala. Konima sho ya teleke aanegumbo anuwa oya kala taye mu ithana andola a ka lye ihe ikwi ipatele owala mondunda ye.
Hamza, ngoka eli okutekulu gwaMugimu anuwa okwa kutha ompani e ta yi mondunda moka a adha hekulu a hulitha nale. Aashiinda mboka nayo aunwa ya mono ompani ndjoka oya uvu oonkugo tadhi zi mooMugimu lwopo 8:00, ihe sho ya matukile mo oya lombwelwa kutya kape na naana uudhigu, ashike aanegumbo owala taya nyenyeta.

Konima yowili anuwa oyu uvu onkugo ontiyali, taya matukile mo ishewe, ihe oshikando shika oya lombwelwa kutya Mugimu okwi idhipaga. Ompani ndjoka ya li pekende lyondunda yaMugimu oya adha ya kuthwa po. Pethimbo ndyoka omweelo gwe ogwa li natango gwa patwa, opolisi oye ye ya yi gu teye po.

IIMALIWA YAMUGIMU
Oonzo otadhi holola Mugimu a galukile koUganda a tonda oombaanga, e ta tokola opo kaa mbaange we iimaliwa ye. Oomwedhi adhihe ndhoka a kala moUganda, anuwa ina mbaanga nande oshimaliwa, ihe okwa kala owala ha pungula iimaliwa ye megumbo, nolundji oha ende owala nayo ngele ta zi mo megumbo.
  Mugimu okwa dhipagwa?
Omugandjimulombo mopolisi yaKampala Metropolitan, Luke Owoyesigyire, onkundana yeso lyaMugimu oya li ya lopotwa kopolisi po3:00, nopolisi oya matukileko mbala kegumbo lye. “Otwa mona kutya Mugumu okwa hulitha nale lwopo6:00 ihe hapo 3:00 ngaashi tashi popiwa kuHamza. Opwa li pe na okambapila ka nyolwa koonyala moka a topolele omaliko ge ofamili ye. Otatu fekele kutya okwi idhipa ye mwene, ashike otatu ningi ngaa omakonaakono,” ta ti ngaaka.

Owoyesigyire ta gwedha po kutya Gorreti Asiimwe, omukulukadhi gwanakusa, aasilishimpwiyu ye yaali, Hamza naHaano namumwainakadhona Nalwanga, oya gandja nale omahokololo gawo koshikondo shomakonaakonokopolisi yokoshikandjo shaKatwe. Ashike Margaret Nakyondwa, omumwayinakadhona gwanakusa ota tsu ompata kutya mumwayina okwi idhipaga, ta ti eso lyaMugimu oshinima sha kundathanwa kwaamboka ya hala omaliko ge, oshoka oombapila dhoohauto nomagumbo gaMugimu ngashingeyi kadhi wetike. Sho oshifo shoSunday Vision sha talele po oshigumbo, Hamza okwa tindi oku za mo mondunda ye yokulala, ta ti okwa sa oomposi, ye ishewe okwa li a vulwa, ina hala oku tya ko sha keso lyaMugimu. Etestamedi lyeliko lya Mugimu inali leshwa esiku lyefumbiko ngaasho osho sha li sha tegelelwa, naAsiimwe ka li a popya onga omuselekadhi, noyanamati yaMugimu inaya tya sha. Asiimwe okwa ti ye ka li ha kala naMugimu. “Katwa li twa hokana pambelewa, ye ishewe okwa adhika ena po omukiintu gulwe. Ngame nangame onda yi owala kegumo lye ongula, nda adha a hulitha nale. Ashike ondu uvu kutya megumbo omwa li omukiintu pethimbo lyeso lye ihe okwa kana po na ina monika we sigo onena. Ondu uvu ishewe kutya ope na gumwe oye e na etestamendi lyanakusa lyo otali leshwa andola mesiku lyefumbiko. Oshike itaa li leshwa?” Asiimwe ta pula.
 
Shoka osha eta opo aakwenezimo lye aluhe ya kale ye mu landula ta ye mu pula omakwatho. Mboka a kala ta kwatha oya kala nokupopyagana, naashika osha eta mboka a tindi okukwathela ya kwate onkone.
“Mezimo omwe ya etopoko omolwa iimaliwa ye,” onzo yimwe osho ya ti. Mu Mai konima yoomwedhi hamano sho a kala a talika ko onga omufuthi, edhina lyaMugimu olya li lya yelekwa, e ta galulilwa iihauto ye itatu, oolapopa dhe noongodhi dhe dhopeke, konima sho omakonaakono ga holola kutya ke na ondjo. Ashike iimaliwe ye ine yi galulilwa.
Uuyelele wa gwedha po: New Vision Uganda

LEAVE A REPLY

Please enter your comment!
Please enter your name here