NFA Galz & Goals tameka omadhewo mOshana

0
30

Shipi Elago

ONGWEDIVA – Oshitopolwa shaShana oshiwike sha za ko osha li sha langeke opoloyeka yaNFA yokatanga kokoompadhi kaakadhona ndjoka ya tseyika nawa NFA Galz & Goals.

Okapale koshiputudhilo shaHifikepunye Pohamba Etine lya za ko oka li ku udha ka fa ofenya sho uukadhona wa za koombinga noombinga dhoshitopolwa shaShana wa li we ya okukutha ombinga muudhano wependulepo lyomawudhano gaakiintu moshilongo.
Konyala uukadhona wa konda po 500 wa za moosikola dha yooloka mOshana owa li wa ulike ohokwe muudhano wokatanga kokoompadhi , nowa li wa ulike kutya onakuyiwa yokatanga kokoompadhi koomeme moshana oyi li momake omawanawa.

Pethimbo a li a patulula endiki lyOmongwediva Chris Kapenaze okwa li a holola kutya Oshana oshi li tashi kutha oonkali pepata ngele otashi ya mehumokomeho lyokatanga kokoomadhi noye li nale ye na iiyimati mbyoka yi na omidhi dha taandela sigo omosipana yopashigwana Brave Gladiators.

Okwati kakele kokatanga kokoompadhi opoloyeka yoGalz & Goals oyi li ya nkondopaleka nokuthitulula omakutsi guukadhona mOshana ngele otashi ya komashongo ngoka ga taalela uukadhona uushona pethimbo ndika ngaashi okuya momilalo nosho wo okukeelela etaandelo lyombuto yoHIV ndyoka li lya vuka unene tu miigwana yaAfrika.

“Elalakano lyopoloyeka ndjika olyo oku eta pamwe uukadhona noku wu longa ontseyo yonkalamwenyo okupitila momawudhano, ngoka ogo ge li ekota lyopoloyeka ndjika, moka aakadhona haya dhana ye li metonatelo lyaadhewuli ya dhewukika noye na ontseyo ya gwedhwa po ngele otashi ya piinima ya kundukidha onkalathano,” Chris Kapenaze tati.

Okwa kombo NFA kombunda sho omvula ndjika e ya pe okapandi kooN$15 000 opo ya vule okutamekitha opoloyeka ndjika.
Uukadhona mbuka otawu kala hawu dhana oliha yokatanga kokoompadhi ndjoka ya tegelelwa yi ka thike pehuulilo kuyele omvula tu uka.
Galz & Goals oyi li miitopolwa 10 yoshilongo; Erongo,Khomas, Zambezi,Oshana,Ohangwena,Kavango East,Otjozondjupa,Omaheke,Hardap noKaras noyi li ya guma oonkalamwenyo dhuukadhona wa konda po 20 000 moshilongo ashihe nohayi kuthiwa ombinga kuukadhona okuza pomimvo dho 13 sigo 19.

LEAVE A REPLY

Please enter your comment!
Please enter your name here