Africa Motto a shangela NFA omukandanyenyeto

0
23

Kefas Shipi Elago

Oshakati – Osipana yokatanga kokoompadhi yomOshakati Africa Motto oyi li ya lya moonyandi konima sho amushanga gwoNFA Barry Rukoro a li a ningi etseyitho kutya Okahandja Military School hoka ka lundulukile molupe lwOkahandja United oko ta ka yi koPremier Liha peha lyawo.

Omunashipundi gwosipana ndjika Dr Muti okwa li a holola kutya oya shangela elelo lyokatanga kokoompadhi omukanda moka ya holola okuuva kwawo konayi nkene oshikumungu shawo noMilitary School kasha na uuyuuki.

Omukanda ngoka wo gu li miikaha yaKundana otagu holola nkene osipana ndjika yi wete kutya oya dhengelwa keholo molwaashoka okuza petameko oosipana odha li dha lombwelwa kutya uudhano otawu tsikile ashike osipana yaNDF itayi ka pitikwa yi ye koPremier Liha naashika Muti okwa ti osha li sha lemaneke uuluwi waadhani ye oshoka oya li ya yi muudhano mbuka ye shi shi kutya nando oya dhengwa kashi na mbudhi oye na ashike okuya koPremier Liha.

Okwa ti oya li ya tuminwa omusholondondo gwoosipana dhaNPL moka Africa Motto a li nale a nyolelwa membo naashika wo osha li sha lemaneke uuluwi waadhani yetu oshoka oya li ye wete kutya ya gondja yaadha eloolo.

Iiningwanima ayihe mbika oya li ya lemaneke uuluwi waadhani yetu naashoka ya li ya yi mokapale naMilitary School ka yali ya lu ngaashi twa kala tu yashi molwa otseyo ndjoka ya pewa kutya esindano nenge edhengo muudhano wawo naMilitary School olyi na ashike oshizemo shimwe shoka tashi ti Motto oye e na ashike okuya koPremier Liha oshoka MS oku na ko nale osipana omwayina ndjoka hayi dhana moliha yopombanda moshilongo.

“Otwa pa NFA ethimbo opo a talulule oshikumungu shika ye etu pe eyamukulo tali tu mbilipaleke ndyoka tali ke tu pa uuyelele kutya out na okukatuka onkatu yini,” Dr Muti ta ti.

Oonkambadhala dhokumona elelo lyaNFA odha li dha huulile muunyengwi, ashike omunambelewa gwaNPL Tovey Hoabeb okwa li a holola kutya oye li nale ya pewa omadhina gwoosipana ndhoka dha yelwa kuNFA okuza kiitayi yoFirst Division moka Africa Motto ita holoka nando mokati koosipana ndhoka.

“NFA oye e na oshikumungu shika momake ge, NPL kenasha no ku yela oosipana tse ohatu unganeke ashike omawudhano gwooliha dhopombanda ndhoka hatu pewa kuNFA onkene itatu ti ko sha koshinima shika, Tovey ta holola.

Okwa ti wo oshinima shoka Motto ta popi kutya oya li ya pewa omusholondondo gwomawudhano gwoPremier Liha odhanakalindi oshoka opo ashike yi ipyakidhila noku eta po omusholondondo ngoka ngashiingeyi. Tovey okwa holola wo kutya oliha onene moshilongo oya tengenekwa opo yi ka shimbike momasiku gatatu ga Novomba nuumvo moka taya ka tetekela noshigongi shiilyo mo 27 ya Kotomba.
Oosipana oompe dhoka dha taambelwa moPremier Liha odho ngaashi Young Brazilian yokoKarasberg, Julinho Sporting F.C yaRundu nOkahandja United.

LEAVE A REPLY

Please enter your comment!
Please enter your name here