Ethigathano lyoVolley Ball lyomahangano noongesefa nonuumvo oko li li

0
13

Kefas Shipi Elago

Oshakati – Aakalimo yomonooli oombwa dha kwata odheni,sho ethigathano lyomahangano noongesefa ta li ka galukila mondambo ehuliloshiwike taliya.

Ethigathano ndyoka lya unganekwa kehangano lyoVolleyball monooli olya tegelelwa li ka nane omahangano gayooloka noongesefa monooli muudhano mboka wu li oshitopolwa shependulepo lyuudhano woVolleyball moshilongo.
Uudhano mbuka owa topolwa miitopolwa iyali moka muna uudhano woVolley wokomunkulofuta ta wu dhanwa kaantu yaali kombinga omanga uudhano woVolley ndjoka ha yi dhanenwa mokapale kehe osipana oya tegelelwa yi kale yina aadhani yane mokapale na yaali pondje yokapale.

Kehehe osipana ta yi kutha ombinga muudhano woVolley yomokapale oya tegelelwa yi kale yina omukiintu gwumwe mokapale ethimbo kehe ta ya dhana.

Osipana kehe ta yi ka kutha ombinga moVolley yaantu ya hamano ota yi ka pulwa opo yi ishangithe nooN$500, omanga ndjoka ta yi ka kutha ombinga muudhano wemunkulofuta mboka ta wu dhanwa kaantu yaali ta ya kiishangitha nooN$200.
Omusindani muudhano womokapale ota ka fadhuka po nokapandi kooN$2500, Omutiyali N$1500 nomutitatu ota ka hekelekwa nokapandi kooN$1000.

Muudhano wemunkulofuta osipana yotango ota yi ka pandulwa nokapandi kooN$1500, ontiyali ota yi pewa N$1000 omanga osipana ontitatu ta yi ka hekelekwa nokashona kooN$500.

Oosipana ndatu dhoka ta dhiya tango ota dhi ka mbendekwa wo oombandi yotango Oshingoli, ontiyali oshisiliveli nontitatu oshikushu.Uudhano mbuka owa kwashilipalekwa koNamibia Volleyball Federation, AQUA Splash, no Namibia Breweries Limited. Esiku lya hugunina lyomayishangitho omasiku 18 ga Kotoba 2018, nuudhano mbuka owa tengenekwa wu ka kaleko muule wehuliloshiwike lyomasiku 20 ga Kotoba omumvo nguka.

LEAVE A REPLY

Please enter your comment!
Please enter your name here