Omudhindolinkundana a lilwa koshigwana

0
224

Loide Jason

WINDHOEK – Aatoolinkunda, aaholi naalanduli yoonkundana noshowo Aanamibia oyendji oya li ya gongala moWindhoek omutenya gwEtiyali opo ya gandje esimaneko lyawo lya hugunina komudhindoli gwoshikundaneki shedhina Kundana noshowo omuhepahadhindoli gwaNew Era Desie-waar Heita ngoka a si eso lyombaadhilila sho a adhika a dhengwa komweelo gwegumbo lye.

Heita okwa manene oondjenda dhe Etine lyoshiwike sha za ko sho a adhika nokamwenyo ke li pothingo koongulasha dhesiku ndyoka kumushiinda she omanga a lala kohi yomweelo ngoka ta kondjo nomwenyo.

Inashi yela kutya omweelo ngoka ogwa dhenge Heita ngiini ashike ogwe mu dhenga sigo eso.
Heita ngoka okwa hokololwa koyendji kutya okwa li omuniilonga ngoka a li ha longo nuudhiginini nokwa li omukwatheli gwa kehe gumwe unene ngele otashi ya piilonga noshowo pamadhilaadhilo gwokwiihumitha komeho miilonga noshowo melongo.
Aapopi ya yooloka mboka ya popi poshituthi shehupulitho ayehe oya hokolola nkene okukalamwenyo kwaHeita kwa li kombanda yevi naashi ya kala naye muukuume noshowo miilonga.

Oshituthihupulitho shoka osha li sha unganekwa koNew Era ehangano ndyoka nakusa a longela oomvula dhi li omulongo. Nakusa okwa li a tegelelwa okugwanitha omimvo 40 omwedhi nguka momasiku ge li 25 .
Toivo Ndjebela ngoka e li kapatashu gwaadhindolinkundana okwa hokolola kutya Heita okwa li omuniilonga ngoka ha longo nuudhiginini na kakwa li ha faula iilonga ye inaa popya mpoka e li.

Ndjebela okwa ti ehangano ndika olya kanitha okawe ngele tashi ya paaniilonga noshowo ependafule mokukundaneka, nokwa ti omwaka ndjoka nakusa a thiga po ondhigu okuthitika.

Omukuluntuwiliki gwehangano olyo tuu ndyoka Audrin Mathe naye okwa ti kutya yo itaya mana okulila sho ya adhika konkundana ndjoka kutya nakusa ke ko we nnatango oye li ashike moluhodhi notaya tindi oku shi itaala.
Mboka ya popi pehala lyookume noshowo ookuume mboka ya gandja iipopiwa yawo oya hokolola kutya nakusa okwa li ena omanenenedhilaadhilo omawanawa okuhumitha komesho okukalamwenyo kwe noshowo nkene ta ka tyapula esiku lye lyevalo sho taka gwanitha omimvo 40.

Omupresidete gwoshilongo Hage Geingob naye woo okwa tuma etumwalaka lyomahekeleko moshigwana sho omutoolinkundana nguka a hulitha.
Heita okwa tegelelwa ok fumvikwa ngula(mOlyomakaya) pomawendo Namdeb, noshitudhifumviko she otashi ka ningilwa poKindom Hall of Jehovah’s Witnesses.

Okwa thiga ko aamwayina, okanona ke kamwe noshowo aakuluntu ye.

LEAVE A REPLY

Please enter your comment!
Please enter your name here