Oontokolwa dhoshigongi shevi otadhi zi momutumba omvula yini?

0
10

Oshiwike shika Aanamibia oyendji oomposi oye dhi mona kolusindo, moka ya kala ye na omeho nomakutsi ga endekela koontokolwa dhoshigongi oshinenene shomutumba gwevi shoka sha li moshilandopangelo. Omutumba gwevi, ngoka konyala gwa li gwa guma Omunamibia kehe pamikalo dhi ili nodhi ili, ogwa pititha oontokolwa odhindji, naashika oshi shi okupandulwa. Omutumba ogwa li gwe ya pehulilo, nonando pwa li omahilathano osho wo okwaa tsa kumwe unene tuu moshimpungu shi na sha nevi lyuuthiga. Omutumba nguka ogwa li gwa gandja ompito opo aakuthimbinga ya gandje omaiyuvo gawo, nosha li tashi shambula okumona Aanamibia yomithika noondondo dha yooloka taya pangelwa kombepo yuuwanawa woshilongo shika. Ngaashi osho shi li kutya omutima gwamukweni okalongo ki ili, aakuthimbinga ya yooloka oya li ye na omayiuvo ga yooloka, noya li ya mono ompito pwaa na nando omambadameko gasha. Nonando omutumba gwu umbu gwa nana ngeyi, oontokolwa ndhoka dha za momutumba, ngele nee otatu tsu kumwe nadho nenge itatu tsu kumwe nadho shoka nashi tegelele manga, ashike epulo oli li mpaka kutya mbela otadhi ka tulwa miilonga uunake. Mutima wu popye to ti oontokolwa oombwanawa, ngoye oto iganda ishewe kutya oombwaananwa ngele tadhi yi miilonga omvula yini? Shika osho oshinima shimwe shoka omutumba gwa ndopa oku eta koontundulu, opo Omunamibia kehe a kale a yelelwa. Uuna pe na oshilalakanenwa shoka ehangano, oohandimwe nenge oshilonga sha hala oku adha, nena ethimbo oli na okukala tali pangele opo shi yele mo nawa, sho shi vule okutulwa koshiviha ethimbo nethimbo.

LEAVE A REPLY

Please enter your comment!
Please enter your name here