Opolojeka yoKudu: Endopo lyetu sigo oompaka

0
20

Pendapala Hangala

Aanamibia oya kondjela oshilongo noonkondo nonuupenda opo shi manguluke, ya hupula molweendo ndoka aamati naakadhona opo ya mangulule ondjila yawo yopolitika neliko. Ashike nando ongawo, onga oshilongo sha manguluka, oshilongo otashi ndopa okulongitha ompito yeyambulepo lyopaliko opo shi kale sha manguluka thiluthilu opo shi kale tashi longo olusheno lwasho shene osho oku lu tuma pamukalo gwokulanditha kiilongo iikwawo. Endopo lyeyambulepo lyeliko lyawo opo ku kale kwa mangulukiwa melongitho lyolusheno olya kwatela mo wo oonzo dhopaushitwe dhilwe moka ngele oshilongo osha li shi itula mo okukala sha yambuka po nawa, ngeno osha ya mondjila yokukala noonzo dhasho dhi li momake gasho shene. Ngele ope na elelo lyi li ngaaka, oshilongo kashi na esiku shi ka pangele paushili ehumokomeho lyeliko lyasho oshoka osha panda okugandja oonzo dhasho dhopaushitwe kaantu yalwe, mpoka haya mono mo ashike iifuta ya za mo noompale. Omaiyuvo gandje kutya omukalo gwa tya ngeyi otagu betray nokusinda omalalakano gekondjelomanguluko na oga pumbwa okupukululwa mbala ngtaashi tashi vulika.

Ehala mpoka pen a Ohaasa yoKudu, ndjoka tayi tengenekwa yi na uule woomvula 25, oya li ya monika tango mo1974, konyala ookiliometa 170 okuza komukunkulofuta gwaOrandjemund moka etengeneko lyotango lya li lyu ulike kutya omu na ohaasa yi thike pootiriliona 1,3 moka omakonaakono ga gwedhwa po ga ulika kutya otashi vulika ga ka adhe ootriliona 9. Nguka omwaalu gu li mokalemo lela, ngele ogwa kwata nawa , otagu vulu, opamwe noonzo dhilwe dhopaushitwe okukwathela okukandula po omawupyakadhi gopaliko nonkalathano moshilongo osho wo okuhinga oshilongo shi kale shi sha putuka. Opolojeka yoKudu oya li tayi ka kotha konyala oobiliona N$16 opo yi ye omwenyo thiluthilu nokonima yi ka ga gandje olusheno lwoomegawat 850, noonkondo adhihe dholusheno nduka otadhi ka gwanena oompumbwe dhetu dholusheno moshilongo ndjoka yi li poowat 520, moka iihupe tayi ka landithwa kiilongo yopuushinda. Petameko lyetungopo ndika opwa li ngeno tamu kwatelwa Namcor osho wo aakwatheli ye opo ya mboole ondjila yohaasa, tayi pitile mopaipi yi na uule wookilometa 170 nenge mombautu opo ye ete kosasiona yolusheno yi li ookilometa 25 popepi nOranjemund, ndjoka ya li ngeno tayi kala mewiliko lyoNampower.

Omukalo nguka omupu, ogwo gwa li gu na okukala po opo Namibia a a kale a manguluka ngele she ya kelongitho lyolusheno nokulanditha, ashike mboka ye na oonkondo dhokuyumudha ondjodhi nndjika yi ninge yoshili oya hogololo onkalo yopaife ndjoka pamadhilaadhilo gandje ndi wete kutya otashi tu shunitha monima. Nampower, ehangano ndyoka hali gandja olusheno moshilongo, okuza oshilongo sho sha manguluka olya longitha oobiliona N$70(oobiliona N$2,8 omvula kehe muule woomvula 28) okulanda olusheno okuza koSouth Africa, onkalo ndjika ngele tayi yelekanithwa noobiliona N$ 16 okutunga osasiona yohaasa yoKudu otashi ulike Namibia ke na iimaliwa ya gwana okutunga. Shoka tashi uvitha nayi osho shika kutya okulanda olusheno okuza koSouth Africa otashi tsikile sigo omo2025 noku pita po.
Sha gwedhwa kwaashoka opo wo oku ulika oonkondo dhshigwana okuyambidhidha opoloyeka ndjika noshimaliwa, GIPF, ehangano enene moshilongo ndyoka hali pungula oopenzela dhaaniilonga olya kuutumba kombanda yoobiliona N$106 moka ya mona kutya osha wapa okutula oobiliona 2 mombaanga yoBank Windhoek, ndjoka yi li nale ombaanga yi ithikamena kuyo yene. Mokusokonona oGIPF nomukalo ngoka hayi longitha nokupungula iimaliwa mbika yopeenzela yaakwashigwana koopolojeka dhopaumwene otashi ulike uushili kutya oyi na oshinakugwanithwa, otayi vulu osho wo okulongitha nokutula oshimaliwa moopolojeka ndhoka dhi na onkalamwenyo onde okukandulapo uudhigu wopaliko nonkalathano, moka ndi wete kutya opolojeka yoKudu otayi vulu okukala yimwe yomoopolojeka ndhika. Onkene, omukalo gwokuyambidhidha pashimaliwa gwa kwatela mo ngiika Ombaanga yependulepo yaAfrica, Namcor, Nampower, GIPF osho wo iimaliwa yilwe yoshigwna otayi vulu okutunga po oolojeka yohaasa yoKudu. Okuya komeho, okutya opolojeka yohaasa yoKudu kayi li itayi zi notayi ka eta ondando yolusheno yi kale pombanda kashi shi oshili nando, unene tuu ngele oto tala oNampower ndjoka ya tula mo nale oshimaliwa shi thike poobiliona N$75 okulanda olusheno koSouth Africa muule woomvula ashike 28, okuyelekanitha nokufuta ashike oobiliona N$15 lumwe aluke oku tula po opolojeka yoku eta po olusheno lwetu yene. Olusheno ndoka talu kotha N$1.69 mowili yokilowatt olu na ondando yi li pombanda noonkondo na italu tu kwathele, unene tuu momudhingoloko moka tu na ompito yokulongitha olusheno lwetu tse yene. Ondjodhi yoKudu nge ya tsu nena ondi wete kutya otayi ka eta ondando yolusheno pevi shoka tashi ka kala oshinima oshiwanawa kAanamibia ayehe.

Ashike opo tu mone nokutaamba ko uuwananwa mbuka tawu zi mopolojeka ndjika osha pumbwa elelo lyi li na oonkondo osho aantu ya hangana shoka ngashiingeyi sha faula onkene pe na okuhehela kwoobiliona odhindji okutula miilonga yaa na oshilonga.
• Pendapala Hangala

LEAVE A REPLY

Please enter your comment!
Please enter your name here