Oshigongi shevi sha ninga omatokolo ogendji

0
43

Loide Jason

WINDHOEK – Oshigongalele shevi shoka sha li ko moshilandopangelo oshiwike sha zi ko osho sha ningi omatokolo ngoka taga tulwa miilonga sho oshigongi shika shopashigwana shahulu oshiwike sha zi ko.

Oshigongi shoka sha li sha gongalwa kaanenentu yopapangelo noshowo kAanamibia oyendji mboka ya za poompito noshowo ye na iinakugwanithwa ya yooloka osha li sha tokola kutya oveta ndjoka tayi ti ehalo lyomulandithi nehalo lyomulandi nayi ze po thilu ee tayi pingenwa po noonkambadhla dhilwe dhokumona evi.

Koshigongi oko tuu hoka okwa li kwa tokolwa okutholomwa nokutulwa miilonga omikalo dhokweendeleleka okugandja evi moshilongo.
“Omavi guunamapya ngoka ge li momake gaakwiilongo oga pumbwa okuga nyekululwa nokufutwa mo kashona. Oofalama adhihe ndhoka dhi li kAanamibia ihe ihadhi longithwa ngaaashi shi na okukala nadho woo odha pumbwa okukuthululwa ko,” oontokolwalandu ndhoka dha tokolwa koshigongi osho dha lesha ngaaka.

Oshigongi osho tuu shoka osha tokola kutya na kutholomwe pamadhilaadhilo uuyelelele kombinga yevi tawu vulu okwiinekelwa mokugongelwa.

Mboka ya li ya gongala moshigongi omo tuu moka oya li woo ya zimine kutya omisindalandu odhindji ndhoka dha yama koohofa nadhi kale dha talululwa nokweendelelithwa opo shi kwathele mokwaandjaganeka evi moshilongo ngaashi sha pumbiwa.
Aatokoli noshowo aagandjimayele moshigongalele osho tuu shoka oya li woo ya gandja omukumo kutya napu tokolwe noshowo okutulwa miilonga omalandulathano ngoka taga keelele uulithilo oouwali.

Okwa li woo kwa tokolwa kutya iipambu yevi mbyoka tayi topolwa pokati kaantu ya pumbwa evi, oonakulwa aakulu noshowo aanona yoonakulwa aakulu nayi kale oopelesenda omilongo heyali omanga aakwashigwana taya mono oopelesenda dh ili 30.

Anuwa napu totwe woo omisindalandu dhimwe ndhoka tadhi kwathele opo aantu aayehe mboka ye na ompumbwe yevi ya kale woo ya mona ompito yokumona evi. Nonando oshigongi osha ninga omatokolo ogendji inapu tokolwa kutya mbika nayi ye miilonga uunake.

LEAVE A REPLY

Please enter your comment!
Please enter your name here