Ovanageshefa ovanyasha va nghonopekwa mo //Kharas

0
17

Tuulikki Abraham

Keetmanshoop – Ouministeli wovanyasha, ombelewa yaNgoloneya woshitopolwa sha//Kharas, oshoyo ehangano loAnglo American Namibia Foundation, ova li va unganeka omadeulo okudeula ovanyasha ovo ve li nale mongeshefa, oshoyo ovanyasha ovo ve na omafaneko okufikamifa po eengeshefa davo.

Omadeulo okwa li ko oshivike shaya moKeetmanshoop. Ovanyasha vahapu ova li va kufa ombinga okudja keembinga adishe doshitopolwa sha//Kharas.

Konima yomadeulopukululo ovanangeshefa, ova li va pewa omhito yokuyandja omafaneko avo, okutya one okovanyasha ovo ve na omafaneko okufikamifapo ongeshefa, ile okovanyasha ovo ve li nale mongeshefa, okuyandja omafaneko anghene ve na okuyambulapo eengeshefa davo.
Elalakano ola li okuyandja omauyele anghene ovanyasha ve na okufikamifapo nokuhumifakomesho eengeshefa, oshoyo okumona omayambidido vadule okutula omafaneko avo moilonga.

Okwa li kwa unganekwa efiyafano, omo omukufimbinga e linyolifa neeN$500,nomunyasha keshe oku na okukala omunyasha womoshitopolwa sha //Kharas, e na eedula di li 16 fiyo eedula 35.

Koshiluku shovanyasha ovo ve na omafaneko oku ka fikamifapo eengeshefa davo, Omufindani wotete oye Innocent Mathys a findana ekopi neeN$15 000., monhomola onhi vali oMartha Johannes N$7000, taku landula Naftal Johannes N$5000, Elzanne Cloete N$3000, naSuzette Kawahandjo N$2000.

Moshiluku shovanyasha ovo ve li nale mongeshefa, nove na ehalo lokunhenenpeka eengeshefa davo Toini Kambode oye e ya ponomola yotete a pewa ekopi neeN$15 000,takulandula Junian Christiaan N$7000, Werner Kadhikwa N$5000, Adrianette Van Neel N$3000, naBehanga Cloete a pewa N$2000.

Kambonde oo e ya omufindani wotete moshiluku shovanangeshefa ovanyasha ovo ve na ehalo lokunhenepeka eengeshefa davo, okwa lombwela Kundana kutya, okwa pandula unene, eshi a li a mona omhito okukala moshiongalele sha tya ngaha.

Omo a likola ounhongo uhapu, wanghene e na okuyakula eekastoma mongeshefa yaye yokupanda. “ Onda pandula unene eshi nda ninga omufindani omunelao, nd amona oshimaliwa N$15 000, oyo handi ke i longifa mokuhumifa komesho ongeshefa yange. Owino otwa likola, kutya, inatu kendabala nande tu tule omundilo momundilo ukwao, kokutya, omuyakulwa dane neuye mongeshefa, te lihumbata omalihumbato inaa pumbiwa, ove ongo mungashefa, muyakula ashike nombili”. Kambode osho afatulula.

Okwa ti yee oku na ongeshefa yaye yokupanda i li koNoordoewer, noku na etimaumbile kutya, nounongo oo alikola okudja moshoongalele eshi, noshimaliwa osho a findana, otashi ka yambulapo onhele yaye yokupandela, noku i tula pamufika u li nawa.

LEAVE A REPLY

Please enter your comment!
Please enter your name here