Keetmanshoop –Gonomvhura 26 gontundiliro zaTanzania kavamundindilire akamoneke kompanguro moKeetmanshoop nkera konyima tupu apa kavamugwene asi kuna kara nomakanya gepangwe gomulyo gokusika ko N$800 000.
Mugwankedesi govaporosi momukunda gwa//Kharas, Nicodemus Mbango mokugava yitundwamo yomahudi mosondaha katente asi mugazarerwa kavamukwete mosundaha koyiha yono vili 12h05 pevango lyomoKeetmanshoop avakeverere vaporosi.
Mokukwama kwendi age Mbango, katente asi vaporosi kavagwene edumba ndi asi mbudi zina kutanta asi mugazarerwa munayirongo, kuna kukambadara asi aronde besa aze koVenduka positasi somaholi saDawid Thomas.
‘’Makura mugazarerwa kakere nye monontarero dovaporosi dogoro ana yasiki pevango eli ava tarere mahauto, omu besa ozo karondere kavazininkire zitunde monzira nokuzifukunya. Vap[orosi kavagwene nye nonsako 16, depangwe mondjato zomiugazarerwa,’’ ano kwanayinye eyi age ana turako nsonso. Siviha somurongero gwendi nagunye gakupulire nye 16.625 kg nomulyo goyimaliwa yokusika ko N$831 250.
Mehudi limwe lyokulikarera, gonomvhura 23 mugara nage hena kalidipagere mwene konyima tupu apa kahamenene mehudi ponze zaRosh pinah momukunda horowero gwa//Kharas momapeu.
Mbango katente asi nakufa kavamudimbwilire asi yige Nantinda Tomas.
Vanekoro lyendi kavavatanterereko mbudi zokuhamena nomfa dendi, mbango katente asi rutu rwa Tomas kavarugwene vantu wokulikarera wokugenda porupadi koyiha yono vili 11h14 momapeu konontere donzira zaRosh Pinah na Oranjemund. Tomas kwakara asi musingi asingi ehauto kutunda moOranjemund aze koRosh Pinah, ano konyara 30 ponze zaRosh Pinah ehauto yipo nye kaliligende.
‘’Konyima zehudi, nakufa kagendere tupu sinano sokusika ko 800 metres sinano tupu opo kalihorokerere ehudi, yipo kava mugwene age ana limanga noliva rwendi mosingo, yina kulikida nye eyi yina horoka.
Kuna kuzuvhika asi nakufa kwagawana ehauto eli kwamukwawo zendi, ogu ana kara asi nage kapisi yige mwenya ehauto.
Eyi tuna kugazara asi nakufa ogu kakere nowoma asi ngapi nakatantera mwenya ehauto.’’ Mbango yimo ngoso ana kugwedako.
Rutu rwanakufa kavarutwere nye koKeetmanshoop nokukarugana makona kono aga nye nagakatwaredera vagwane asi yinke ngapi omu kayigendere adogoroke.