KATIMA MULILO – Sikiliti sa Zambezi nesilaelize muzamaisi wa likolo la tuto mwa sikiliti sa Zambezi ya pumuzi fa musebezi Josty Kawana Labubeli. Kawana na kwanisize lilimo zemashumi asilezi kweli yefelile, mi nabelekile mwa muuso lilimo zemashumi amalalu kazesilezi. Ukile aba muzamaisi wa likolo la tuto mwa sikiliti sa Zambezi ka silimo sa 2021, kasamulaho akuba mubakweli kuzwa silimo sa 2013.

Mwa manzwi ahae Kawana naize naikutwa tompo kuli nakonile kufiwa kolo yakuetelela likolo la tuto mwa sikiliti sa Zambezi. Naekelize kuli musipili usali omutelele wakubona kuli mayemo atuto ananulwa mwasikiliti. “Haiba kuna ni bene ni tunkile maikuto baniswalele. Nihupula kuna ni bane babulelelanga kuli muzaimaisi so sebelisa mata ahao maswe. Nesi cwalo. Zene ni eza kaufela neni lieza kaku yelela ni ofesi yene ni sweli,” nekubulezi Kawana.

Kanako yeswana likolo la tuto neli amuhezi muzamaisi yomunca watuto mwasikiliti Alex Sikume. Kawana na amuhezi Sikume mi amu eleza kuli musebezi wanga haki obunolo. Nakupile babeleki mwalikolo kuli basike ba ba bapanya kono babeleke ni kutusa Sikume. “Kuna ni ba bakataha mwa ofesi yahao kuto kufa likelezo zemaswe, uba teleze kono usike walatelela likelezo ze maswe, ubeleke ni mañi ni mañi ni kubona kuli mayemo atuto ananulwa mwasikiliti,” nekubulezi Kawana.

Sikume mwamanzwi ahae naize uitukiselize kubeleka ni mañi ni mañi kubona kuli sikiliti sa Zambezi sa nanuha mwa mayemo atuto. “Lukona kueza hande haiba inge lubeleka hamoho, hanikoni kueza cwalo ni nosi. Nikafa kamaiso yetokwahala kuzwelela kwa ofesi ya sikiliti, mi ni itekela kuli ketelelo yeswana ibonahale mwa maofesi amwatasi, kungelela cwalo ni maticele baluna. Nimisepisa kuli haiba kaufela luna inge lueza zelulukela kueza, luka balelwa mwasikwata sa likiliti ze eza hande mwanaha,” nekubulezi Sikume.

Bazamaisi babañwi bane bali kwa mukopano wataezano neba lumbile Kawana kuli nasebelize katata, kakuba muuna yana ikokobeza kono yana kumalezi kwa musebezi wahae. Mubusisi wasikiliti sa Zambezi Lawrence Sampofu ni yena nalumbile Kawana kakutoma musumo omunde, mi naelelize Sikume kunga lumonyi loluswana ni kunanula mayemo atuto mwa sikiliti sa Zambezi.