ONGWEDIVA – MEtivali omhangulilo yaMangestrata oya li ya anyene omulumenhu obooloha moshibofa sheponokelo pamukalo wokuninga omatilifo nonande ovakwashiwana va li va ngudumanena omhangu tava pula opo omulumenhu oo a pewe obooloha. Ovakalimo vokomukunda Omushimani moshitukulwa shaShana ova li va ninga omahololodilaadilo pondje yomhangu mOndangwa omo va li va pula mangestrata a pe Fillipus Kalumbu,omunamido 66 omhito yeifutilemo, tava ti okwa li oshihakanwa shomahepeko te a ningilwa komukulukadi waye novena.

Nonande ongaho omhangu oye mu tindila obooloha noya undulila oshibofa shaye mefiku lo1 Noveba. Kalumbu okwa li a tulwa moipandeko moshibofa sheponokelo pamukalo womatilifo eshi vati a ningila nekulu laye omambadameko. Okwa li a mangwa po eshi a li metifa lokudika eumbo laye li li mekove olo li na eumbo lavo nomukadi, e shi ninga konima e shi e li nika komilungu namwene womukunda.

Kalumbu okwa kala hadi novakwapata okudja muJuli odula ya dja ko, sha landula vati konima yeenhamanana novamwanakadona meumbo lavo. Ovakadona ava vatatu Magrieda Kalumbu, Liina Kalumbu naSunday Kalumbu ova li  ova li va tulilwa mo oibofa yokuponokela nelalakano lokuehameka omunhu kolutu eshi va ponokela xe omudwaali.

Molwa oikonene ei eshi va mangwa po, ovakadona ava vatatu navo ova tulila mo xe oshibofa shehepeko kolutu oo a li a pewa obooloha yeN$400 odula ya dja ko. Magrieda naLiina ova li va pewa ve lifutile mo N$1000 omanga Sunday a li a takelwa omunwe.

She likwatelela kouyelele oo wa li po efimbo olo, ava vatatu ova ponokela xe manga a li ta diki oshuunda. Vati ava vatatu ova li va ninga onghedabala yokunghapa xe nekatana.