Opolisi moshitopolwa shaMusati oya manga po okamatyona komimvo 18 hoka ka ponokele aanegumbo, omanga inaaka dhipaga yinakulu gwomimvo 78.
Omukuluntu gwopolisi moshitopolwa shaMusati Titus Shikongo okwa ti, omulumentu ngoka konima a li a mangwa po tango kopolisi oshiwike sha zi ko,  okwa li a falwa kosaala yanuuvu ye na uunkundi womadhiladhilo omolwonkalo a li muyo naasho kwa li ta ihumbata.
Otaku hokololwa kutya omumati ngoka okwa li ta longo iilonga iikumithi komeho gopolisi. “Okwa ningi esiku moshipangelo, ihe ngashiingeyi okwa lalekwa sho a ti po nawa nokwa shunwa konima yekumba,” Shikongo ta ti ngaaka.

Shikongo okwa ti, oshingwanima shoka osha holoka oshiwike sha zi ko lwopotundi 21h00 yuusiku momukunda Enongo momudhingoloko gwaNesi. “Otaku hokololwa kutya omulumentu ngoka okwa li a tameke ta ulike omayinyengo taga limblilike, ethimbo kwa li ta y ali nayinagona oshowo na yinakulu,” Shikongo ta popi ngaaka.

Ta ti, sho ya mana okulya uulalelo, kehe gumwe okwa yi a ka lale kondunda ye, nokonima ashike yokathimbo okashona, oya uvu omumati ngoka ta kugu kondunda ye. Shikongo ta hokolola ta ti omukulupe nomwanakadhona oya li ya tondokele kokalili komumati ngoka.
Ta ti, okwa thikile a ponekela yinagona tango, ngoka a li a mono ompito yokutondoka po. Otaku hokololwa kutya okwa li a ponekele yinakulu nokumudhenga noshinima kaashi shiwike, omanga yinagona kwa li ta igidha ye ta dhengele opolisi, aakwanezimo naashinda, a holama konima yegumbo. “Pethimbo opolisi ya thiki, oya thikile miita nomulumentu ngoka sigo ye mu pondola, e taye mu fala koshitaasi,” Shikongo a hokolola. Shikongo ta ti omukulupe okwa li a monika a lala pevi pethimbo ndyoka ta zi ombinzi komayulu nokwaako kwa teka sho a dhengwa komutekulu gwe. 

Anuwa okwa li a falwa koshipangelo, e li monkalo ombwinayi hoka a ka hulithila.
Omumati ngoka omunasikola posikola Iilyateko Combined, e li mondondo 11.
Opolisi inayi tseyithilwa natango kutya oshike sha etitha oshiningwanima shoka shi nyanyaleka, nonando a li a falwa koshipangelo oshoka okwa li ta fekelwa omadhiladhilo ga za pehala, ihe ngashiingeyi oku li hwepo, noku li momake gwopolisi. Aakwanezimo oya tseyithilwa nomakonakono gwopolisi oge li metifa.