Omunangeshefa ngoka e li moforex Michael Amushelelo okwa li a pewa ombooloha mompangu yaMangestrata  yaWindhoek ohela moshipotha shekengelelo lyelongitho lyoshimaliwa. Amushelelo pamwe nomunangeshefa omukwawo Gregorie Cloete oya li ya pewa kehe yi ifutile mo nooN$35 000 sho ya holoka mompangu lwotango.

Oombapila dhompangu otadhi ulike kutya mbaka yaali oya li ya pewa iimaliwa kaakwashigwana ya adha poomiliona N$17 nelalakano lyokugandja omayakulo gopambaanga. Aayeti yoshipotha taya ti shika Michael nakuume ke oye shi ningi pwaa na epitikilo lyoveta ndjoka hayi kondololoa oombaanga. Onga oshitopolwa shoombooloha dhawo, ompangu oya gandja elombwelo kaalumentu mbaka yaali ya gandje omikanda dhawo dhokuza mo moshilongo kaakonaakoni yoshipotha. Oya lombwelwa wo kutya itaya vulu okuthiga po oWindhoek  kaapu na epitikilo lyaanambelewa yopolisi mboka taya konaakona oshipotha, yo oye na oku ilopota kopolisi kehe Omaandaha, Etitatu nEtitano.

Oshipotha shawo osha li shu undulilwa komeho komasiku 14 Apiilili 2020. Amushelelo okwa li a kalelwa po kuTaimi Ileka-Amupanda omanga Cloete a li a kalelwa po kuKadhila 
Amoomo.