Victoria Kaapanda

ONGWEDIVA- Opolisi moshitopolwa Oshana oya manga po omuntu gumwe sho a adhika nomahooli shaa li paveta mOshakati koongulasha dhOmaandaha.  Omupopiliko gwopolisi moshitopolwa shaShana Ispekta Thomas Aiyambo, okwa ti opolisi oya li ya kwata po omandini ge li 13 ge na oolitela kumwe 475, ga adhika kugumwe gwomaafekelwa mboka ngashingeyi ya mangwa po.

“Aafekelwa mbaka oya li wo ya adhika nomandini gahamano ga pwa shoka tashi ulike kutya omandini ngaka nago oga li ga longithwa mokulanda omahooli shaa li paveta,” Aiyambo ta ti ngaaka.

Omandini oga li ga adhika ga holekwa mokambashu ke li pooha dhegumbo molukanda Uupindi. Ohauto yoToyota Hilux ndjoka ha longitha mokututa omahooli nayo wo oya kwatwa po.

Aiyambo ta ti oya li ye shi pondola okukwata omufekelwa nguka sho ya nothelwa ko kaakwashigwana mwaashoka ta ti elongelokumwe ewananwa pokati kopolisi noshigwana mokukeelela iimbuluma moshitopolwa.

“Aakwashigwana oyo omeho nomakutsi gopolisi. Omulumentu nguka okwa li a mangwa po mbala konima sho a li a lopotwa,” Aiyambo ta fatulula ngaaka. Nonando omakonaakono oge li metifa natango, opolisi otayi fekele kutya oge na okukala ga za koAngola. Omwedhi gwa za ko opolisi mOshana oya li wo ya manga po aafekelwa yamwe yokweeta omahooli moshilongo mOmashaka mOndangwa, sho ya li ya adhika nooliitela 70 dhomahooli. Natango yaali oya li ishewe ya mangwa po oshiwike sha za ko.