Victoria Kaapanda

ONGWEDIVA - Aanyasha inaya nyanyukilwa iizemo yomahogololo guuPresidente nOmutumba Gwopashigwana ngoka ga li ga ningwa Etitatu lyoshiwike sha zi ko miitopolwa ayihe moshilongo.
Pelagia Petrus (28) okwa ti okwa li a inekela omuulikwa a ithikamenapo Panduleni Itula a kale a sindana.

“Onda li ndi na omukumo oshoka aanyasha oyendji oya li ya kutha ombinga momahogololo nelalakano limwe ashike, shoka sha kala ihashi ningwa kaanyasha momagololo ga pita, iizemo kandi yi uvite nando okashona,” Petrus ta ti ngaaka.

Ta gwedha po ta ti elalakano lye lyokuhogolola omupresidente gumwe, ke shi ngoka ta lele oshilongo paife, okwa li a hala omalunduluko. Oshoka ngele gumwe ta longo shoka inashi opala oha lundululwa, ee tapu tulwa ngoka ta vulu okulonga shoka shi li mondjila.

“Oshike ano wu na okushuna omuniilonga miilonga ngele owu wete kutya ite ku longele shoka wa hala noshi li mondjila?” Petrus ta pula nongeyo.

Ta popi ta ti oshilongo shika ke wete kutya osha uka peni. Ta ti aakwashigwana otaya mono iihuna managa taya lombwelwa kutya moshilongo kamu na iimaliwa.

“Ano iimaliwa mbyoka hatu uvu tayi yakwa mepangelo ohayi zi peni ngele kamu na imaliwa moshilongo? Omamilliona otaga yakwa komuntu gumwe ashike, omanga iimaliwa mbyoka yali ya gwana okuyambidhidha aantu ayehe moshilongo,” Petrus ta ti ngaaka.

Omugundjuka nguka okwa ti, ota indile epangelo opo lyi kale tali pula mboka haya yaka iimaliwa yepangelo, ye yi fute ayihe ngaashi ye yi yaka, ihe hakufalwa koohofa.

Petrus okwa ti omuleli gwongundu ndjoka ya sindana nuumvo, na lundulule, na tale oshigwana ashihe shaNamibia. Ta pula aaleli ya longe nuundhiginini opo Omunamibia kehe a mone ompito okutula omboloto poshitaafula.