Anthony Joshua okwa hala okumonathana naDeontay Wilder opo ya tule po esiku ndyoka taya ka taalelathana ngele okwa dhenge Andy Ruiz Jr. Enyakwa  lyoheaveweight lyoWBA, IBF noWBO Joshua, 29, ota ka taalela Ruiz moNew York mOlyomakaya. Enyakwa lyoWBC Wilder okwa li a tseyitha kutya natango otaya ka shuna mondambo naLuis Ortiz gwaCuba.
“Otandi ka kuutumba naWilder ndi tale ngele otandi vulu okukaatumba naye,” Joshua ta lombwele oBBC Sport ngaaka.
“Sho aantu haya popi muuvidio nokooTv osha yooloka uuna ya tsakanena. Onkene ondi na okukaatumba naye opo ndi mone kutya oku na po shike.
Wilder okwa sindana omalugodhi 41 gomolalugodhi 42, ye ta dhana shi thike pamwe naTyson Fury muDesemba a zi ko. Okwa li a dhenge Ortiz yimwe nomiiyagaya medhingoloko 10 muMaalitsa gwo2018 nokwaa li a popi kutya natango otaya ki itaalela. Ngoka a li enyakwa nale Tyson Fury okwa ti otashi vulika natango yi ki itaalele naWilder muMaalitsa nenge muApilili.
Joshua okwa li a idheula kashona komeho gaantu moManhattan mEtiyali, a li nomudheuli gwe Rob McCracken. Ruiz okwa li ta monika nawa kolutu nokwa li afuula ngoka ta ka tanga uudhano mbuka koBBC Radio 5, Mike Castello muudhano mbuka tawu ka dhanenwa moMadison Square Garden. 
Ruiz, 29, ngoka e na uukwashigwana waAmerica nando e na omidhi dhe koMexico okwa li a dhana uudhano we wahugunina momasiku 20 Apilili nuumvo. Ashike ngele okwa sindana, otashi ka kala oshinima tashi kumitha aalanduli oyendji yuudhano woongonyo.
Joshua ta gwedha po: 
“Okulwa nooRuiz yomuuyuni muka osha nika oshiponga shi vulithe okulwa naWilder. Omolwashike ndi na okulwa nomuntu e na oshipewa ngoka ta vulu okudhenga ndje manga pe na Wilder ngoka e na shoka nda hala? Onda hala okukutha ompito yaWilder. Inandi hala okukala tandi kondjo naamentu mbaka Onda hala okuya nda ukilila kuudhano mboka uunene.”
Uudhano pokati kaJoshua, ngoka e li enyakwa lyoIBF, WBO noWBA osho wo Wilder enyakwa lyoWBC otali ka mona omapaya agehe gane taga hanganithwa oshikando shotango mondjokjonona yoshiviha shoheaveyweight.
Ngoka ha unganeke nokuhwahwameka omaudhano gaJoshua Eddie Hearn okwa li a pula opo omudhani gwe a pule Wilder e mu kondjithe  nokwa popya kutya oonkundwa dhuudhano mbuka ihadhi zi okwe dhi loloka.
Ruiz naye okwa li e ya pemate uule konyala wominute 10 nokwa li ta monika a gundjila nawa nokwa li ta yamukula omapulo. 
Iikundaneki yimwe mbyoka ya li po oya li yu ulike nkene Joshua a li a nana nuudhigu sho ta kondjithathana nomuntu omushona kuye molutu, Aleksander Povetkin, 39, gwaRussia. 
“Aantu oyendji ohaya dhini ndje, sho tandi monika, ashike otandi ka geyitha oyendji.”