Omukanda wokutula omunhu moipandeko owa yandjwa momhangulilo yaMangestalata moPinetown okukwata po omushikingalo wongalo wogqom Babes Wodumo nohonda yaye Mandla “Mampintsha” Maphumulo eshi vadopa okuholoka komesho yomhangulilo oyo tuu oyo mEtivali la dja ko. 
Ovaholafani ava ve na ekwatafano la nyika omidilombiya okwa li va lombwelwa va alukile keemhangu konima eshi kwa li va lombwelwa va ye kofikola yonghalafano. Eshi osha landula oshiningwanima omo Babes a patululila Mampintsha oshibofa shokudenga noku ehameka kolutu muMaalitsa neudo. 
Omukalelipo wopaveta waMampintsha, Pat Magwaza okwa ti ke shi apa ovapangulwa ava vavali ve li, ta ti okwa kendabala ngeno e va konge ashike ine shi pondola. 
“Onda li nda lombwelwa kutya ove li keumbo lavo, ashike eshi nda ya ko inandi va hanga ko,” Magwaza ta ti.
Omweeti woihokolola wepangelo Ndoda January ye okwa lombwela omhagu kutya ovaholafani ava ova mana eetundi dopanghalafano koFAMSA ashike inave uya natango kuye ve mu pe eedjapo davo.  
Mampintsha okwa li e litwala ye mwene kopolifi muMaalitsa eshi Babes e mu patulila mo oshibofa. Eshi osha li sha landula okavideo ka li koInstagram omo mu na Mampintsha ta denge Babes nomanghava. 
Eshi oshikando oshitivali omhangu ya pitifila Babes omukanda woku mu tula moipandeko. Omukanda wotete owa li wa shangwa konima eshi a li a dopa okuholoka komhangu molwa oshibofa shedengo, e shi ningile muApiilili.